Tags-Abroo

teġh-e-abrū tīr-e-mizhgāñ sab rakhe haiñ saan par
in dinoñ us kī taraf kab ham se dekhā jaa.e hai

tumhārī abrū-e-kaj kā thā duuj kā dhokā
siyāh hotā agar iid kā hilāl huā

tirī ik jumbish-e-abrū se aalam ho gayā zaa.e
nazar kar jis taraf dekhā to jo dhaḌ thā so be-sar thā

abrū ne tire khīñchī kamāñ jaur-o-jafā par
qurbāñ karūñ sau jiiv tire tīr-e-adā par

laḌ ga.ī un se nazar khich ga.e abrū un ke
ma.arke ishq ke ab tīr-o-kamāñ tak pahuñche

teġh o kamand maañg kar abrū o zulf se
āshiq bahut hue haiñ jafā-kār maar Daal

tīr-e-abrū jab kamāñ tak aa ga.e
un kī zad meñ jism-o-jāñ tak aa ga.e

ḳhanjar ḳhanjar qātil abrū dilbar haath masīhā hoñT
lahū lahū hai shām-e-tamannā aañsū aañsū sub.h-e-tarab

mubassir jauhar-e-ḳhat par kahīñ haiñ us ke abrū ko
surūhī koī hai be-kal ki jis kā ab ye kuunā hai

kanār-e-chashm se abrū tak aa gayā kājal
ki aaj sehn-e-haram meñ utar ga.e bādal

jo dekhī us kī vo teġh-e-abrū to jī ko haibat ne aan gherā
nigah jo kākul ke daam par kī to dil ko is kā shikār dekhā

vahī iqrār meñ inkār ke lākhoñ pahlū
vahī hoñToñ pe tabassum vahī abrū pe shikan

abrū se un ke ġhamza tīr-e-adā lagātā
ye dil qatīl hotā ye jaañ shahīd hotī

patlī gardan patle abrū patle lab patlī kamar
jitnā bīmār aadmī itnā trahdār aadmī

ajī sar uThā kar idhar dekhnā
isī chashm o abrū pe itnā ghamanD

laḌā kar aañkh us se ham ne dushman kar liyā apnā
nigah ko naaz ko andāz ko abrū ko mizhgāñ ko

vaañ hile abrū yahāñ pherī gale par ham ne teġh
baat kā iimā se paanā koī ham se siikh jaa.e

lagā jab aks-e-abrū dekhne dildār paanī meñ
baham har mauj se chalne lagī talvār paanī meñ