Tags-Kashti

ham ahl-e-junūñ paar utar jā.eñge lekin
kashtī abhī sāhil se bhañvar tak nahīñ aa.ī

ek kashtī-kāġhzī par ġhaur-o-ḳhauz
hogā merī sādgī par ġhaur-o-ḳhauz

mirī qismat kī kashtī bahr-e-ġham meñ Duub saktī thī
tirī taqdīr se shāyad mirī taqdīr ubhrī hai

bahr-e-mohabbat ke sāhil kī sair bahut kar lī ham ne
aao zarā ab ham bhī dekheñ baiTh ke pyaar kī kashtī meñ

mirī kashtī bhañvar se khelne kā shauq rakhtī hai
ye kis ne kar diyā ḳhāmosh yārab mauj-e-tūfāñ ko

tūfān-e-sad-zavāl se kashtī bachā.iye
ḳhatra na Talne vaalā hai ye bādbān se

do nasloñ kī kashtī thī vo pichhle dinoñ jo Duub ga.ī
bhīge jismoñ vaalo lagegā tum ko sambhalte vaqt bahut

ek kashtī ġharq merī aañkh meñ hotī huī
ik samundar mere andar maujzan hotā huā

kis taraf moḌ deñ TuuTī huī kashtī apnī
aise tūfāñ meñ kahīñ koī kinārā bhī to ho

kinār-e-āb na pahuñchegī jaan kī kashtī
bahut dinoñ se hai paanī meñ ishti.āl aisā

raat saarī kisī TuuTī huī kashtī meñ kaTī
aañkh bistar pe khulī ḳhvāb meñ dariyā dekhā

Dūbtā saaf nazar aayā kināra koī dost
phir bhī kashtī se nahīñ ham ne utārā koī dost

betāb havā ke jhoñkoñ kī fariyād sune to kaun sune
maujoñ pe taḌaptī kashtī hai aur gūñgā bahrā paanī hai

baiThe haiñ sunahrī kashtī meñ aur sāmne niilā paanī hai
vo hañstī āñkheñ pūchhtī haiñ ye kitnā gahrā paanī hai

ḳhudā ke naam se tūfān meñ kashtī utārī
bhañvar jitne samundar meñ the, sāhil ho ga.e haiñ

dariyā kī kyā bisāt ki mujh ko Dubo sake
kashtī kahīñ kahīñ mirī Dolī hī kyuuñ na ho

nāḳhudā huuñ maiñ apnī kashtī kā
ye ḳhudāoñ kā silsila kab tak

tūfān-e-inqalāb se māyūsiyoñ ke ba.ad
kashtī pukārtī hai kinārā na chāhiye

bhañvar meñ merī kashtī ko yahī ehsās rahtā hai
Dubone meñ mirā ye nāḳhudā shāmil na ho jaa.e

phir bhī to kuchh sabāt ko us ke zarar nahīñ
ulTī ravāñ hai bahr meñ kashtī habāb kī