Tags-Kashti

darūn-e-girdāb ab jo jā kar phañsī hai kashtī hamārī yārab
sarishk-e-yās ab bhī hai jo āñkhoñ se kyā kaheñ mājrā-e-dariyā

Duub kar kashtī kabhī ubhrī nahīñ pātāl se
jītnā mumkin nahīñ hotā hai ḳhud ko haar kar

ham kashtī jalā kar aa.e haiñ
ab ruup kināre rahne de

ai mire dariyā agar koī bharosa ho tirā
chhoḌ jā.ūñ maiñ tirī lahroñ se kashtī bāñdh kar

kashtī hamārī bahr kī hai māñjdhār meñ
nikle haiñ kab kashākash-e-lutf-o-ġhazab se ham

jis samundar meñ hai shaah kashtī mirī
us meñ Duube hue bhī bahut din hue

dariyā ke ruḳh bahne vaalī machhlī murda machhlī hai
us kashtī kī ḳhair nahīñ hai jis ne lañgar chhoḌ diyā

gale lagā ke samundar hasīn kashtī ko
sukūt-e-tīra-fazā.ī meñ bad-havās rahā

muntazir ho na terī āñkheñ to
merī kashtī kā kināra na rahe

tūfān abr-o-bād meñ sab haiñ ghire hue
kashtī ko de to kis kī ḳhabar bādbān de

jhilmil se kyā rabt nikāleñ kashtī kī taqdīroñ kā
taare kashf nahīñ kar sakte be-āvāz jazīroñ kā

kashti-e-anfās zer-e-āb bhī hai shola-bār
tah-ba-tah jaise koī mauj-e-sharar paanī meñ hai

paḌ ga.ī chakkar meñ kashtī nā-ḳhudā
ab ḳhudā par is ko chhoḌā chāhiye

kaif-e-ḳhudī ne mauj ko kashtī banā diyā
hosh-e-ḳhudā hai ab na ġham-e-nāḳhudā mujhe

uThī mauj-e-sabā jumbāñ se shāḳh-e-āshiyāñ paiham
chalī jaatī hai goyā kashtī-e-bulbul samundar meñ

chhoTī sī kashtī banā hai āsmāñ bālā-e-sar
sail-e-ashk is tarah chashm-e-ḳhūñ-fishāñ bālā-e-sar

yuuñ karnā tum jugnū le kar aa jaanā
maiñ ik dost se kashtī le kar aatā huuñ

kitnī duur talak jā.egī zabt kī ye kashtī
kitnā gahrā hai is dard kā dariyā dekheñge

nāḳhudā kashtī meñ sūrāḳh kiye jaatā hai
ham bhī Dūbeñge vahīñ aap jidhar jā.egā

girya-o-āh be-asar donoñ
kis ne kashtī mirī tabāh na kī