Tags-Khamoshi

sar jhukā.e hue muñh pher ke ḳhāmoshī se
duur maġhrib ke dhuñdlakoñ meñ chalī jaatī hai

zehn par jab dard ḳhāmoshī kī chādar tāntā hai
qatra qatra aañkh se lafz-o-ma.ānī chhāntā hai

dil vāloñ kī ḳhāmoshī hī bār-e-samā.at hotī hai
be-āvāzī karb-e-fazā hai tum bhī chup ho ham bhī chup

ḳhāmoshī bohrān-e-sadā hai tum bhī chup ho ham bhī chup
sannāTā tak chīḳh rahā hai tum bhī chup ho ham bhī chup

be-maqsad mahfil se behtar tanhā.ī
be-matlab bātoñ se achchhī ḳhāmoshī

laboñ pe jam ga.ī dīvār-o-dar kī ḳhāmoshī
tamām shahr thā vīrāñ sadā lagāte kyā

kaho kyā baat kartī hai kabhī sahrā kī ḳhāmoshī
kahā us ḳhāmushī meñ bhī to ik taqrīr hotī hai

āvāzoñ kā jamnā is se sābit hai
jaise ham ḳhāmoshī kī āvāzeñ haiñ

aisā mahv huuñ ḳhāmoshī ko sunñe meñ
maano mujh se pahle kī āvāzeñ haiñ

qissa ye mahdūd na thā kuchh hoñToñ kī ḳhāmoshī tak
kahne ko to kahtī thī un āñkhoñ kī tahrīr bahut

merā maqsad ki vo ḳhush hoñ mirī ḳhāmoshī se
un ko andesha ki ye bhī koī fariyād na ho

dar-o-dīvār sisakte hai kamī par terī
ghar meñ ḳhāmoshī kā ik shor bapā rahtā hai

āsāñ nahīñ hāl-e-dil ayaañ ho jaanā
ḳhāmoshī se tum na bad-gumāñ ho jaanā

bazm-e-jāñ meñ bahut thī ḳhāmoshī
jaane us kā ḳhayāl thā kyā thā

hamārī ḳhāmoshī yā hamāre chillāne par
bachchoñ kī tarah

āvāzoñ meñ bahte bahte
ḳhāmoshī se mar jaatā huuñ

furqat kā dukh bas vo samjhe jis par biite
maiñ huuñ suunā ghar hai gahrī ḳhāmoshī hai

terā saaya tere saath safar kartā hai
mere saath musalsal chaltī ḳhāmoshī hai

mujh ko 'ansar' roz pareshāñ kar detī hai
tere hoñToñ par jo rahtī ḳhāmoshī hai