Tags-Khamoshi

andarūn-e-hisār-e-ḳhāmoshī
shor kī tarah mach rahā huuñ maiñ

dard-āmez hai kuchh yuuñ mirī ḳhāmoshī bhī
raas aatī nahīñ mujh ko ye ḳhirad-poshī bhī

merī bāteñ jaise dhuup ho sarmā kī dālānoñ meñ
barfeñ terī ḳhāmoshī kī

raat bhīgī to sisaktī huī ḳhāmoshī se
āsmāñ phuuT paḌā jism ke chhāloñ kī tarah

kabhī ḳhāmoshī bhī yuuñ boltī hai pyaar ke bol
koī ḳhāmoshī meñ bhī naġhma-sarā ho jaise

merī ḳhāmoshī ko chupke se sajā do aa kar
ik ġhazal tum bhī mire naam kabhī likkho nā

zarroñ meñ jumbish thī koī chhā.ī thī fazā par mad-hoshī
ik niiñd thī har shai par taarī qudrat bhī thī mahv-e-ḳhāmoshī

jis kī ḳhāmoshī meñ aaseb sukūñ karte hoñ
aisā vīrāna basāyā to nahīñ jā saktā

jañgaloñ meñ ḳhāmoshī habs kī alāmat hai
tāzgī sī dete haiñ bolte hue patte

ek balā kā shor-o-ġhul
merī ḳhāmoshī meñ thā

merī āvāz pe khultā thā jo dar pahle-pahal
maiñ pareshāñ huuñ ki ḳhāmoshī pe ab khultā hai

bas itnā bol rahī chāragar kī ḳhāmoshī
balā kā dard dil-e-nā-tavāñ se guzrā hai

dil kī havelī par muddat se
ḳhāmoshī kā qufl paḌā hai

ek nagar ke naqsh bhulā duuñ ek nagar ījād karūñ
ek taraf ḳhāmoshī kar duuñ ek taraf ābād karūñ

hotī hai laboñ par ḳhāmoshī āñkhoñ meñ mohabbat hotī hai
jab un se nigāheñ miltī haiñ us vaqt ye hālat hotī hai

bench pe phailī ḳhāmoshī
pahuñchī peḌ ke kānoñ tak

jitnī gahrī chup hai utnī āvāzeñ
ḳhāmoshī ne shor machānā siikh liyā

is qadar chīḳhtī rahtī hai ḳhāmoshī mujh meñ
shor kānoñ meñ utar jaa.e to bahrā ho jā.ūñ

nigal na jaa.e kahīñ mujh ko dasht-e-ḳhāmoshī
akelā chhoḌ ke jaao na ai sadāo mujhe

koī āvāz na aahaT na koī halchal hai
aisī ḳhāmoshī se guzre to guzar jā.eñge