Tags-Khat

dekhā but-e-nau-ḳhat ne jo mujh ko to kiyā chaak
naama to raqīboñ ko raqam hoī chukā thā

zahe qismat navāzā hai javāb-e-ḳhat se 'vāsif' ko
dikhāte ik jhalak itnī ināyat aur ho jaatī

dil kī tasvīr ḳhat meñ rakh denā
baat dil kī likhā nahīñ karnā

ḳhat meñ us ko kaise likkheñ kyā paanā kyā khonā hai
duurī meñ to ho nahīñ saktā jo aapas meñ honā hai

tumhāre ḳhat meñ mohabbat ke rañg bikhre haiñ
jo ye ġhalat hai to lafzoñ meñ phir dhanak kyuuñ hai

kyā chiiz hai ibārat-e-rañgīñ meñ sharh-e-shauq
ḳhat kī tarah tabī.at-e-basta agar khule

mire ḳhat ko le ke ḳhushī se vo ka.ī baar chūmegī tū magar
mujhe Dar hai bhīgā vo lafz ik mire ġham kā qissa sunā na de

ruuh ghabrā.ī huī phirtī hai merī laash par
kyā janāze par mere ḳhat kā javāb aane ko hai

ḳhat-o-ruḳhsār-o-chashm-o-zulf dikhlā kar lagā kahne
ye raihāñ hai ye gul hai aur ye nargis hai ye sumbul hai

ḳhat kā mazmūñ hai mire hī vāste
go lifāfe par kisī kā naam hai

nazmeñ ġhazleñ ḳhat afsāne
us ke naam raqam hote haiñ

rañg kyā ajab diyā merī bevafā.ī ko
us ne yuuñ kiyā ki mere ḳhat jalā.e uud meñ

kal apne muriido.n se kahaa piir-e-muGaa.n ne
qiimat me.n ye ma.anii hai dur-e-naab se dah-chand

kuchh nahīñ hai tire hāthoñ meñ lakīroñ ke sivā
baat nāseh kī hai lekin ḳhat-e-taqdīr bhī hai

is daur meñ ki chehre hī 'anjum' hue haiñ masḳh
kyā ḳhatt-o-ḳhāl se tire andāza kījiye

jo laash bhejī thī qāsid kī bhejte ḳhat bhī
rasīd vo to mire ḳhat kī thī javāb na thā

sunā hai ham ne ki aariz pe hai ġhubār sā kuchh
balā se ḳhat kā hamāre agar javāb nahīñ

havā.eñ paḌh ke apne naam ke ḳhat jhuum jaatī haiñ
mohabbat se jo pattoñ par shajar tahrīr karte haiñ

block hone ke the imkān bahut
ḳhat pahuñchte hī ḳhatā.eñ huiiñ rad

jo ḳhat hai shikasta hai jo aks hai TuuTā hai
yā husn tirā jhūTā yā aa.ina jhūTā hai