Tags-Khat

āmad-e-ḳhat se huā hai sard jo bāzār-e-dost
dūd-e-sham-e-kushta thā shāyad ḳhat-e-ruḳhsār-e-dost

ilāhī 'āsī'-e-betāb kis se chhūTā hai
ki ḳhat meñ roz-e-qayāmat likhā hai naam ke baad

vo ḳhat vo chehra vo zulf-e-siyāh to dekho
ki shaam sub.h ke baad aa.e sub.h shaam ke baad

jo laal lafzoñ se ḳhat likhā thā
mujhe milā hai javāb niilā

vaqt hī vo ḳhat-e-fāsil hai ki ai ham-nafaso
duur hai mauj-e-balā aur kināre hue log

vo ḳhat meñ likh rahe haiñ tirī āfiyat nahīñ
mujh ko adam kī raah kā parvāna mil gayā

ik samundar ke havāle saare ḳhat kartā rahā
vo hamāre saath apne ġham ġhalat kartā rahā

kaun sā dil hai jo dīvāna nahīñ hai us kā
ḳhat-e-shab-rañg se sarmāya-e-saudā hai vo ruḳh

us gul ko bhejnā hai mujhe ḳhat sabā ke haath
is vāste lagā huuñ chaman kī havā ke haath

vaqt ke saath tujhe bhuul hī jaatā lekin
ik hare ḳhat ne mire zaḳhm ko taaza rakkhā

nadī pe chāñd kā partav tirā nishān-e-qadam
ḳhat-e-sahar pe añdheroñ kā raqs tū tirā ġham

ḳhat likh ke kabhī aur kabhī ḳhat ko jalā kar
tanhā.ī ko rañgīn banā kyuuñ nahīñ lete

tumhāre ghar 'nūn-mīm-rāshid' kā le ke aayā sifārshī ḳhat
magar ta.ajjub hai phir bhī tum se nahīñ maiñ kuchh 'faiz' pā rahā huuñ

pairāhan-e-falak pe jahāñ ḳhatt-e-nūr hai
dāman hai vaañ se chaak vahīñ se uTheñge ham

ḳhat se vo zor safā-e-husn ab kam ho gayā
chāh-e-yūsuf thā zaqan so chāh-e-rustam ho gayā

pyaar kā pahlā ḳhat likhne meñ vaqt to lagtā hai
na.e parindoñ ko uḌne meñ vaqt to lagtā hai

ye tere ḳhat tirī ḳhushbū ye tere ḳhvāb-o-ḳhayāl
matā-e-jāñ haiñ tire qaul aur qasam kī tarah