Tags-Khat

tasvīr-e-ġhair bhej ke us ne ba-laff-e-ḳhat
unvāñ ye likh diyā tire ḳhat kā javāb hai

lāDle ne ḳhat ke badle paise bhijvā.e magar
baap milne kī tamannā dam-ba-dam kartā rahā

ye aa.ina rahā ḳhatt-e-shikast se mahrūm
'salīm' mahv-e-ġham-e-intizār-e-sañg rahā

mire mazmūn-e-soz-e-dil se ḳhat sab jal gayā merā
qalam se harf jo nikle sharar hī yak-qalam nikle

likhā kis husn se ḳhat meñ ki ham tujh se kashīda haiñ
kashish harfoñ kī aisī hai ki ham bhī saad karte haiñ

huī hai ab to unheñ lafz lafz se nafrat
javāb-e-ḳhat meñ kahīñ daad saad laam nahīñ

hai jin kane muhayyā pakkā pakāyā khānā
un ko palañg pe baiThe jhaḌiyoñ kā ḳhat uḌānā

bhej kar ḳhat unheñ bulvā.eñ muhibbān-e-suḳhan
kuchh bhī mahfil meñ nahīñ 'nūh' jo mahfil meñ nahīñ

shāyad mizāj ham se mukaddar hai yaar kā
likkhā hai us ne ham ko ba-ḳhatt-e-ġhubār ḳhat

saada kāġhaz pe ḳhuun ke aañsū
ab use ḳhat meñ aur kyā likkhūñ

de ke ḳhat muñh dekhtā hai nāma-bar
kuchh to paiġhām-e-zabānī aur hai

sāda-rūī qahr thī aur us pe ab aayā hai ḳhat
dekhiye anjām kyā hotā hai is āġhāz kā

be diye le uḌā kabūtar ḳhat
yuuñ pahuñchtā hai uupar uupar ḳhat

jis ḳhat meñ tañke the mire ashkoñ ke sitāre
vo ḳhat bhī jalāo.ge ye ma.alūm nahīñ thā

yaar ko ma.alūm hotā hai hijr meñ soyā nahīñ
ḳhat likhūñ goyā bayāz-e-dīda-e-bedār par

ḳhat use itne likhe maiñ ne ki vaañ bhar javāb
baiThe rahte haiñ kabūtar saikḌoñ dīvār par

javāb-e-ḳhat kā un ke sāmne kab hosh rahtā hai
batāte haiñ patā mere bajā.e nāma-bar apnā

añdherā hai kaise tirā ḳhat paḌhūñ
lifāfe meñ kuchh raushnī bhej de

qāsid ḳhilāf-e-ḳhat kahīñ terā bayāñ na ho
karnā sambhal ke baat ki vo bad-gumāñ na ho

is ishāre ko vo samjhā to magar muddat ba.ad
apne har ḳhat meñ use rāt-kī-rānī likhnā