Tags-Khat

shāyad us saada ne rakhā hai ḳhat
ki hameñ muttasil likkhā hai ḳhat

kuchh ḳhalal raah meñ huā ai 'mīr'
nāma-bar kab se le gayā hai ḳhat

saath ham bhī ga.e haiñ duur talak
jab udhar ke ta.iiñ chalā hai ḳhat

naama kab yaar ne paḌhā saarā
na kahā ye bhī āshnā hai ḳhat

phir dhanak-rañg tamannāoñ ne gherā mujh ko
phir tire ḳhat mujhe dīvāna banāne aa.e

sunahrī rut ke kisī nīlgūñ tanāzur meñ
ḳhat-e-ufuq pe vo piilā gulāb phir na khilā

ye ḳhat hai jauhar-e-ā.īna-rāz
ise mushk-e-ḳhutan kahnā bajā hai

bas ho chukā bayāñ kasal-o-ranj-e-rāh kā
ḳhat kā mire javāb hai ai nāma-bar kahāñ

kaam ye lā javāb karte ho
mere ḳhat kā koī javāb nahīñ

vahī ḳhat ki jis pe jagah jagah do mahakte hoñToñ ke chāñd the
kisī bhūle-bisre se taaq par tah-e-gard hogā dabā huā

har harf pe do aañsū Tapak paḌte haiñ ai vaa.e
ḳhat yaar ko likhnā hameñ dushvār huā hai

ḳhaas andāz se ḳhat likhtā hai vo parda-nashīñ
ham use nudrat-e-paiġhām se pahchānte haiñ

ḳhat-e-abyaz nazar kā dhokā thā
shab kā anjām to siyāhī rahā

gore hāthoñ meñ bane chauḌī ḳhat-e-sāġhar kā aks
tere dast-e-nāz meñ nāzuk sā paimāna rahe

vo taḌap jaa.e ishāra koī aisā denā
us ko ḳhat likhnā to merā bhī havāla denā

qatl-e-qāsid pe kamar bāñdhī hai 'shola' us ne
ḳhat kitābat kī mulāqāt hai ye bhī na sahī

maañ ne likhā hai ḳhat meñ jahāñ jaao ḳhush raho
mujh ko bhale na yaad karo ghar na bhūlnā

us ek ḳhat ne suḳhnavar banā diyā mujh ko
vo ek ḳhat ki jo likkhā nahīñ gayā mujh se

qismat kī lakīreñ dekh to leñ tahrīr magar ye aam nahīñ
is ḳhat ko bhalā kyoñ kar samjheñ jis ḳhat meñ hamārā naam nahīñ

jab guzartī hai us galī se sabā
ḳhat ke purze talāsh kartī hai