Tags-Khat

gar hifāzat ruḳh kī hai manzūr to miTvā na ḳhat
bāġhbāñ rakhtā hai kāñTe baaġh kī dīvār par

paḌhūñ tum ko mohabbat goshe goshe meñ nazar aa.e
lifāfa khol kar ye ḳhatt-e-sāda kaun dekhegā

paḌh ke qāsid ḳhat mirā us bad-zabāñ ne kyā kahā
kyā kahā phir kah but-e-nā-mehrbāñ ne kyā kahā

jo sham.a-rū ke do lab haiñ shīrīñ to sabza-e-ḳhat bajā hai us par
zamīn pakḌī hai tūtiyoñ ne sunīñ jo mīThī piyā kī batiyāñ

ḳhat chuum ke āñkhoñ se lagāte hue 'komal'
royā thā bahut TuuT ke har baar sipāhī

shab-e-furqat jo ḳhat likhā maiñ ne
zulf-e-jānāñ sā vo tavīl huā

yahāñ tak un ko pās-e-rāz-e-ḳhat thā
ki ḳhāme kī zabāñ pahle qalam kī

aariz pe tere joshash-e-ḳhatt-e-siyāh hai
yā rome par chaḌh aa.ī hai ye fauj-e-zañgiyāñ

mirā ḳhat paḌh ke bole nāma-bar se jā ḳhudā-hāfiz
javāb aayā mirī qismat se lekin lā-javāb aayā

āshiq-e-zulf ko do bosa-o-ḳhatt-o-abrū
mus.haf-e-ruḳh pe likhūñ zer-o-zabar aaj kī raat

yaqīñ to ye hai vo ḳhat kā javāb likkheñge
magar navishta-e-qismat kisī ko kyā ma.alūm

dekh kar bad-dimāġhiyāñ un kī
nāma-bar ḳhat mirā paḌhā na sakā

mirā ḳhat ye kah ke ġhairoñ ko diyā
ik zarā is kī ibārat dekhnā

hai dalne ko chhātī pe tirī muuñg ḳhat-e-sabz
gar zahr-e-ġham-e-hijr khilāyā to huā kyā

mat kah ki tasavvur meñ ḳhat-e-sabz ke mere
gar 'shāh'-nasīr ashk bahāyā to huā kyā

paḌh ke terā ḳhat mire dil kī ajab hālat huī
iztirāb-e-shauq ne ik hashr barpā kar diyā

nahīñ hai mohr lifāfa pe ḳhat ke ai qāsid
ye daaġh hai mirī qismat kī nā-rasā.ī kā

nahīñ sham.a-e-āriz pe ḳhat jama.a haiñ
hazāroñ hī parvāne jalte hue

ye dast-e-nāz meñ ḳhat tarjumān kis kā hai
agar nahīñ hai tumhārā bayān kis kā hai

kāġhaz siyāh karte ho kis ke liye 'nasīm'
aayā javāb-e-ḳhat tumheñ aur nāma-bar gayā