Tags-Khat

pahlī baar vo ḳhat likkhā thā
jis kā javāb bhī aa saktā thā

mirī mohabbat ke rāz-dāñ ne ye kah ke lauTā diyā mirā ḳhat
ki bhīgī bhīgī sī āñsuoñ meñ tamām gunjalak ibārateñ haiñ

ḳhat jo aayā hai unhīñ kā hogā
haañ zarā aaj tabī.at thī bahāl

jis kā mayassar na thā bhar ke nazar dekhnā
kahtā hai ḳhat aa.e par Tuk to idhar dekhnā

tū hī chal ai ruuh josh-e-shauq hai
ḳhat ke aane meñ to arsa ho gayā

jis ne bhejā hai tere haath ye ḳhat
maiñ nahīñ us se āshnā qāsid

mohr ko ḳhat kī dekh kahne lagā
kaun 'bedār' hai batā qāsid

kyā ḳhabar us ko lage kaisā ki ab ke ham ne
apne ik ḳhat meñ use dost purānā likhkhā

merā naama ḳhat-e-muqaddar thā
ki nazar se tirī guzar na sakā

payām-bar ko abas de ke ḳhat udhar bhejā
ġharīb aur vahāñ se shikasta-hāl aayā

haa.e kin āñkhoñ se dekhūñ us ruḳh-e-raushan pe ḳhat
chashma-e-ḳhurshīd meñ ye kyā ḳhas-o-ḳhāshāk hai

rūThne vaalī ḳhat paḌh kar fauran hī lauT aa.iiñ
ham ne likhā thā sale lagī hai kapḌā dekheñge

phūñk Dālūñgā kisī roz maiñ dil kī duniyā
ye tirā ḳhat to nahīñ hai ki jilā bhī na sakūñ

har ḳhushk-o-tar hastī pe raqam hai ḳhatt-e-jalī meñ naam tirā
har zarre meñ terā ma.abad har qatra tīrath dhaam tirā

tumhārā ḳhat mujh ko mil gayā hai
abhī paḌhā hai

phaaḌ kar ḳhat us ne qāsid se kahā
koī paiġhām-e-zabānī aur hai

hue jo radd-o-badal aise kitne baar nazīr
to us ne ḳhat kā hamāre na phir javāb likhā

saaf qāsid ko vaañ javāb milā
mere ḳhat kā yahī javāb milā

mazmūn-e-ḳhat usī se hai zāhir ki hogā kyā
qāsid kī jā jo ashk ko ham ne ravāñ kiyā

haiñ dīdanī banafsha o sumbul ke pech o taab
naqsha khīñchā huā hai ḳhat-o-zulf-e-yār kā