Tags-Khoon

ḳhūn-e-ma.asūm se dīvāroñ par
ġham kā afsāna likhā jaatā hai

roz apnā hī ḳhuun piitā huuñ
aisī kab thī darindagī mujh meñ

dil kā ḳhuun huā ho shāyad
duur pare jo kohrā sā hai

jis se ho aañsū ḳhūn-e-jigar ban jaa.e aqīq-o-la.al-o-guhar
ḳhurshīd-o-qamar aur sīm-o-zar ai jaan magar hai partav-e-ruḳh

bahā kar ḳhuun merā mujh se bole
ki le jiine se apne haath dho le

aur paidā kar apne ḳhuun se phuul
rāt-din mātam-e-bahār na kar

buniyād jamāne meñ jin kī kyā kuchh na bahā thā ḳhūn-e-jigar
ai vā-asfā un mahloñ kā ik chashm-e-zadan meñ Dah jaanā

ḳhuun ke chhīñToñ se kuchh phūloñ ke ḳhāke hī sahī
mausam-e-gul aa gayā zindāñ meñ baiThe kyā kareñ

baiTh kar maiñ likh gayā huuñ dard-e-dil kā mājrā
ḳhuun kī ik buuñd kāġhaz ko rañgīlā kar ga.ī

kis kis ko apne ḳhūn-e-jigar kā hisāb duuñ
ik qatra bach rahā hai so vo bhī nibaḌ gayā

āzādi-e-insāñ ke vahīñ phuul khileñge
jis jā pe zahīr aaj tirā ḳhuun girā hai

ye mai-kada hai yahāñ ḳhūn-e-dil kī baat na kar
yahāñ to tazkira-e-bād-o-subū hī rahe

ḳhūn-e-jigar sharāb o tarashshah hai chashm-e-tar
sāġhar mirā giro nahīñ abr-e-bahār kā

ḳhūn-e-nāhaq hamārā uchhlegā
rañg laayā jo shoḳh holī meñ

jo guloñ ne chehre pe mal liyā jo kalī ne maañg meñ bhar liyā
vo ghaḌī bhī aa.egī dekhnā yahī rañg ḳhūn-e-bahār he

ḳhud apne ḳhuun meñ pahle nahāyā jaatā hai
vaqār ḳhud nahīñ bantā banāyā jaatā hai

hargiz ḳhum-e-falak meñ nahīñ hai sharāb-e-ishq
ġhunchoñ kī ḳhūn-e-dil se bharī haiñ gulābiyāñ

sharbat kā ghūñT jaan ke piitā huuñ ḳhūn-e-dil
ġham khāte khāte muñh kā maza tak bigaḌ gayā

jamāl-e-sehn-e-gulistāñ hamīñ se qaa.em hai
hamāre ḳhuun se har phuul ḳhush-libās huā

vaqt aayā to ḳhuun se apne dāġh-e-nadāmat dho leñge
sāya-e-zulf meñ jāgne vaale sāya-e-dār meñ so leñge