Tags-Khoon

har ik lamha hamārā ḳhūn-e-tāza
mohabbat joñk ban kar chūstī hai

ashk aa.e haiñ to ye sair-e-charāġhāñ bhī sahī
is se aage to vahī ḳhuun kā dariyā hogā

zindagī aa tujhe qātil ke havāle kar duuñ
mujh se ab ḳhūn-e-tamannā nahīñ dekhā jaatā

yaar go ḳhuun mirā misl-e-hinā ho pāmāl
lekin apne ta.iiñ manzūr qadam-bosī hai

ḳhuun kā kaam ravāñ rahnā hai
jis jagah chāho bahā lo ham ko

us ko tanhā pā ke 'aslam' raat apne room meñ
qatra-e-ḳhūn-e-havas ā.ankhoñ meñ aayā kyuuñ nahīñ

bhar le piyāla ḳhum-kada-e-zīst se 'hafīz'
ḳhūn-e-jigar hai sāmne chal kar ḳhudā ke pī

ḳhanjar chalā thā mujh pe magar mo.ajaza hai ye
qātil kā apnā ḳhuun hī ḳhanjar pe naqsh hai

duā hai phir bhī salāmat rahe ye mai-ḳhāna
evaz meñ mai ke piyā ḳhuun bāda-ḳhvāroñ ne

ye ittifāq hai in ko vafā na raas aa.ī
bahāyā ḳhuun jigar tere jāñ-nisāroñ ne

chhupā chhupā ke rakhā thā jise bahāroñ ne
ugal diyā hai vahī ḳhuun lāla-zāroñ ne

ḳhuun shiryānoñ kā āñkhoñ meñ dikhā.ī de sake
tū bhī dariyā hai agar 'shāhid' to tuġhyānī meñ aa

ab se pahle vo mirī zaat pe taarī to na thā
dil meñ rahtā thā magar ḳhuun meñ jaarī to na thā

apne ḳhuun se itnī to ummīdeñ haiñ
apne bachche bhiiḌ se aage nikleñge

phailte shahroñ ke jañgal meñ ye ġhāroñ kī tarah tañg makāñ
ḳhuun meñ vahshi-e-ḳhvābīda bhī bedār huā chāhtā hai

māthe par ye kanThā dekho jaise koī taaj
ye raaja haiñ par nahīñ piite kamzoroñ kā ḳhuun

sharāb-e-ḳhūn bin taḌpūñ se dil labrez rahtā hai
bhare haiñ sañg-reze maiñ nai is mīnā-e-ḳhālī meñ

tū sach kah rañg paañ hai ye ki ḳhuun ishq-bāzāñ hai
suḳhan rakhte haiñ kitne shaḳhs tere lab kī laalī meñ

ḳhuun pattoñ pe jamā ho jaise
phuul kā rañg harā ho jaise

'manzar' bhī nafāsat ke alam-dār the lekin
ab ḳhuun ke in dāġhoñ ko dhonā nahīñ achchhā