Tags-Khoon

hamārā jurm yahī hai ki haq-parast haiñ ham
hamāre ḳhuun kā pyāsā har ek ḳhanjar hai

ragoñ meñ aaj bhī ye ḳhuun sā ravāñ hai kyā
vo dard-e-ishq haqīqat meñ jāvedāñ hai kyā

jo dil meñ ḳhūn-e-tamannā kiyā na karte ham
to misl-e-shola bhaḌak kar jalā na karte ham

piyo ki muft lagā dī hai ḳhūn-e-dil kī kashīd
girāñ hai ab ke mai-e-lāla-fām kahte haiñ

kāvish-e-mizhgān kā paiham taqāzā hai 'azīz'
har-nafas ko tere ḳhūn-ālūd honā chāhiye

ḳhushā ai zaḳhm ki sūrat na.ī nikaltī hai
bajā.e ḳhuun ke ab raushnī nikaltī hai

ashk-e-ḳhūñ ba.ad meñ 'sarshār' bahāne the agar
ḳhūn-e-ushshāq bahāne kī zarūrat kyā thī

ye log mujhe ḳhuun kā tājir na samajh leñ
maiñ teġh liye phirtā huuñ sar jaane ke Dar se

timsāl pe ḳhūn-e-nāhaq bhī aur ātish-e-zulm-o-jaur bhī hai
Duubī huī chashm-e-shauq bhī hai ḳhush-rañg ruḳh-e-jānāna tak

jaane kyā kyā bol rahā thā sarhad pyaar kitābeñ ḳhuun
kal merī nīndoñ meñ chhup kar jaag rahā thā jaane kaun

ye lamha jo guzrā mire ḳhuun kī us meñ surḳhī milī hai?
mire āñsuoñ kā namak is kī lazzat meñ shāmil huā hai?

ab talak hairān huuñ maiñ raat ke us ḳhvāb se
ḳhuun kī barsāt hai ghar tar-ba-tar merā bhī hai

chūmā hai jin laboñ hazār un ke ḳhuun muaaf
to jhuuT ḳhuub bol yaqīñ kar rahe haiñ ham

umr kā sūraj sivā neze pe aayā
garm shiryānoñ meñ bahte ḳhuun kā dariyā bhañvar hone lagā

baḌā ehsān hogā mere dil kā ḳhuun kar Daalo
yahī majbūr kartā hai yahī majbūr hotā hai

ye manzar ye ruup anokhe sab shahkār hamāre haiñ
ham ne apne ḳhūn-e-jigar se kyā kyā naqsh ubhāre haiñ

shoḳhī-e-naqsh koī hādsa-e-vaqt nahīñ
mo.ajaza-e-kārī-e-ḳhūn-e-dil-e-fankār to dekh

laash ke nanhe haath meñ basta aur ik khaTTī golī thī
ḳhuun meñ Duubī ik taḳhtī par ġhain-ġhubāra likkhā thā

haar dekhā bhī ḳhūn-e-āshiq kā
aap aur sar jhukā.e baiThe haiñ