Tags-Khoon

ragoñ meñ ḳhuun gardish kar rahā hai
javānī sāz-e-dil par gā rahī hai

teġh-e-qātil pe chamaktī hai mire ḳhuun kī zau
shahr-e-bedād meñ ḳhat likh ke bulāyā huā maiñ

is se baḌh kar judā.ī kyā hogī
ab to āñkhoñ se ḳhuun bahtā hai

aap kā dhyān ḳhuun ke mānind
dauḌtā hai idhar-udhar mujh meñ

kaun dekhegā hamārī ḳhūn-āmezī yahāñ
aa ga.e andhoñ meñ ham rañgoñ ke tājir kis liye

tere hāthoñ par lagā hai be-gunāhoñ kā lahū
jām-e-jam meñ mai nahīñ ḳhūn-e-siyādish hai muġhāñ

dauḌtī hai jo mire ḳhuun meñ terī hasrat
dekh ā.īna use ḳhuun kī pyāsī likkhūñ

ḳhuun ke dariyā bah jaate haiñ ḳhair aur ḳhair ke biich
apne-āp meñ sab sachche haiñ masjid o dair ke biich

havā.eñ itnī ḳhunuk thiiñ ke ḳhuun jamne lagā
to tapte sehra kī kuchh ret oḌh lī maiñ ne

ḳhūn-e-jigar se ham ne guloñ ko nikhār kar
gulshan ko pur-bahār kiyā hai kabhī kabhī

aag kī surḳh lipaT ne mujhe pāgal rakkhā
ḳhuun kī lahr ko is ghaat se kyā lenā hai

phir na shab-ḳhūn kā vaqt aa.egā
raushnī un ke Thikānoñ meñ nahīñ

ik mauj-e-ḳhūn-e-ḳhalq thī kis kī jabīñ pe thī
ik tauq-e-fard-e-jurm thā kis ke gale meñ thā

kis kā dil ḳhuun nahīñ hai chaman-e-ālam meñ
pattī pattī se hameñ bū-e-vafā aa.ī hai

ḳhuun ġharīboñ kā dāman meñ apne nā lagne deñge
sapnoñ ke gar mahal hamāre Dahte haiñ to Dahne do

chhoTī chhoTī bātoñ par yuuñ ḳhuun ḳharāba ho jaatā hai
ham 'ehrām' zamīr ko takte takte thak kar so jaate haiñ

kaam ik ye tire āshiq ne baḌā ḳhuub kiyā
ḳhuun se likh ke ravāna tujhe maktūb kiyā

khāyā thā kis ke haath se 'ehsās-jī' ne paan
ḳhūn-e-badan sab us kī bas ik piik meñ milā

aane lagī hai zahr kī ḳhushbū shumāl se
jhalkegā rañg ḳhuun kā asr-e-zavāl se

Daal ke ḳhaak mere ḳhuun pe qātil ne kahā
kuchh ye mehñdī nahīñ merī ki chhupā bhī na sakūñ