Tags-Khoon

mere dīvān ke māthe pe ye kis ne likkhā
ḳhuun meñ bhīge varaq saare yahāñ milte haiñ

rok sakte ho to roko maz.habī takrār ko
ḳhuun yuuñ bahtā rahā to ye sadī mar jā.egī

mahfil meñ dostoñ kī vahī naġhma ban gayā
shab-ḳhūn kā jo shor thā mere makān par

marīz-e-ishq ko hai dard-e-dil davā ke liye
rahī ġhizā so hai ḳhūn-e-jigar ġhizā ke liye

ġhizā ġham meñ thī merī ḳhūn-e-jigar
ab a.adā kā bhī rashk khāne lage

ye jahāñ raqs meñ nahīñ yūñhī
sab mire ḳhuun kī ravānī hai

kahīñ ḳhūn-e-dil se likhā to thā tire sāl-e-hijr kā sāneha
vo adhūrī Diary kho ga.ī vo na-jāne kaun sā saal thā

hatheliyoñ ke gulāboñ se ḳhuun ristā rahā
magar vo shoḳhī-e-rañg-e-hinā nahīñ aa.ī

kyā kījiye numā.ish-e-ġham ḳhūn-e-dil ke ba.ad
ab ārzū-e-dīda-e-ḳhūñbār bhī nahīñ

mere bayāñ meñ sehr-bayānī tujhī se hai
rū-e-suḳhan pe ḳhūn-e-javānī tujhī se hai

ye maslahat bhī kyā ki dil kī vus.ateñ hoñ munjamid
ragoñ meñ zindagī kā ḳhuun dauḌnā to chāhiye

kisī pe yuuñ nahīñ paḌtī nigāh-e-ḳhūn-ā-shām
hamīñ haiñ tīr-e-sitam ke nishāñ bahut achchhā

vo jo likkhā thā kabhī ḳhūn-e-jigar se maiñ ne
miTtā jaatā hai vahī naqsh-e-vafā mere ba.ad

zamīñ par ḳhuun itnā bah gayā hai
havāoñ meñ bhī ḳhushbū aa rahī hai

ka.ī lāshoñ kī fasleñ kaT chukī haiñ
ki dhartī ḳhuun meñ nahlā rahī hai

kahne ko yuuñ to abr-e-karam qatra-zan huā
vo gul khile nadīm ki ḳhūn-e-chaman huā

baġhair yaar gavārā nahīñ kabāb sharāb
gazak hai daaġh mujhe aur ḳhūn-e-nāb sharāb

Dar nahīñ thūkte haiñ ḳhuun jo dukh paa.e hue
laḳht-e-dil ban ke nikal jā.eñge ġham khaa.e hue

yahāñ bedāriyoñ se ḳhūn-e-dil āñkhoñ meñ aatā hai
gulābī kartī hai āñkhoñ ko vaañ tāsīr sone kī

raqs kartī huī bahāroñ meñ
ḳhūn-āshām ḳhār-zāroñ meñ