Tags-Khoon

naḳhl-e-mizhgāñ se hai kyā jāniye kyā chashm-e-samar
chashm paanī kī jagah ḳhūn-e-jigar detī hai

gale hazāroñ ne apne kaaTe hazāroñ be-vaj.h ho ga.e ḳhuun
bahut huā phir tū yaar nādim kaf-e-hinā.ī dikhā dikhā kar

kāñToñ ko pilā ke ḳhuun apnā
rāhoñ meñ gulāb bo rahā huuñ

bārhā nanhā sā dil ḳhuun huā zer-e-falak
ġhunche par guzrī hai kyā kyā gul-e-tar hone tak

ḳhūn-e-jigar kā hāsil ik sher-e-tar kī sūrat
apnā hī aks jis meñ apnā hai rañg bharnā

rafūgarāñ mire zaḳhm-e-anā se aajiz haiñ
ki mere ḳhuun kī tezī rafū samajhtā hai

tum jaise ham lagne lageñge Thahro to
ham bhī apnā ḳhuun badal kar aate haiñ

falak ke dāman pe chāñd taare nahīñ daraḳhshāñ to kyā 'nujūmī'
hazāroñ armāñ kā ḳhuun de kar maiñ shab ko rañgīñ banā rahā huuñ

dil-e-garm ḳhūn-e-ulfat mire bar meñ rakh diyā hai
sū-e-gul to multafit huuñ jo kalī ko maiñ na dekhūñ

ḳhūn-e-nāhaq kahīñ chhuptā hai chhupā.e se 'amīr'
kyuuñ mirī laash pe baiThe haiñ vo dāman Daale

ḳhūn-e-ushshāq hai ma.ānī meñ
shauq se paan khā.iye sāhab

hamāre baad hī ḳhūn-e-shahīdāñ rañg lā.egā
yahī surḳhī banegī zeb-e-unvāñ ham nahīñ hoñge

phir zarā ḳhanjar-e-qātil ko ḳhabar de koī
ḳhūn-e-'bismil' meñ vahī josh nazar aatā hai

aap ke nashtar-e-mizhgāñ ko chubho letā huuñ
ḳhūn-e-dil meñ jo kabhī josh nazar aatā hai

baa.eñ taraf ke rāste sāñsoñ meñ baT ga.e
agle qadam kī chaap pe vo ḳhuun ro gayā

qatl kar ke mujhe talvār ko toḌā us ne
ḳhūn-e-nāhaq se pashemāñ na huā thā so huā

ho gayā dekh ke qaazī bhī taraf-dār us kā
be-gunah ḳhūn-e-musalmāñ na huā thā so huā

chhiḌak ke ḳhuun rag-e-dil haqīr zarroñ par
savād-e-manzil-e-jāñ ke surāġh raushan kar

girya anjām-e-tabassum hai na hañs ai ġhāfil
ḳhuun ro.eñge vahī zaḳhm jo ḳhandāñ hoñge

ḳhūn-e-dil se idhar ġhazal likkhī
naqsh terā udhar ubhar aayā