Tags-Khoon

jo pasand aa.e tujhe ḳhūn-e-jigar ke badle
sone chāñdī kī vo sauġhāt kahāñ se lā.ūñ

samundaroñ kī bhī vus.at jo pyaas se kam ho
hamāre ḳhūn-e-jigar ko sharāb likh denā

ashk-bārī nahīñ furqat meñ sharar-bārī hai
aañkh meñ ḳhuun kā qatra hai ki chiñgārī hai

mere ashkoñ kī ravānī ko ravānī to kaho
ḳhair tum ḳhuun na samjho ise paanī to kaho

kaliyāñ kis daur ke tasavvur meñ
ḳhuun hote hī muskurātī haiñ

shahr sajte haiñ guzar-gāheñ chamak uThtī haiñ
apne hī ḳhuun meñ Dūbūñ to sañvar jaatā huuñ

dil hai us sozan-e-mizhgāñ se mushabbak merā
chhūTne kyuuñ lage ḳhuun kā favvārā sā

shiddat par hai hare-bhare pattoñ kī pyaas
sahrā sahrā ḳhuun samundar likhnā hai

na ye zamīn huī us ke ḳhuun se gulnār
na āsmāñ se utārā gayā kafan us kā

ḳhūn-e-dil se jo likhā thā vo miTā ashkoñ se
apne hī naame kī tahrīr pe ronā aayā

buuñd buuñd meñ ḳhuun utar aayā dekho
kaisī hai barsāt kaho to bolūñ maiñ

ho gayā ḳhuun tire hijr meñ dil kā shāyad
ab tasavvur bhī tirā naqsh-bar-āb aatā hai

sahmā sahmā har ik chehra manzar manzar ḳhuun meñ tar
shahr se jañgal hī achchhā hai chal chiḌiyā tū apne ghar

ragoñ meñ ḳhuun shoḳhī kar rahā hai
sitāra sī vo peshānī nahīñ hai

hai aaj ḳhūn-e-tamannā to kal ummīd kī maut
dil-e-hazīñ ne janāze uThā.e haiñ kyā kyā

kāñToñ ko pilā ke ḳhuun apnā
rāhoñ meñ gulāb bo rahā huuñ

kār-gāh-e-hastī meñ laala dāġh-sāmāñ hai
barq-e-ḳhirman-e-rāhat ḳhūn-e-garm-e-dahqāñ hai

yalġhār kar rahī thī mozāhim pe dam-ba-dam
kis darja garm ḳhuun anā ke badan meñ thā

kabhū rañg se hinā ke sar-e-dast-o-pā nigārīñ
na sivā-e-ḳhūn-e-āshiq kareñ ye nigār-bandāñ

zer-e-ḳhanjar maiñ taḌaptā huuñ faqat is vāste
ḳhuun merā uḌ ke dāman-gīr ho jallād kā