Tags-Khoon

aaj kyuuñ haath tire kaañp rahe haiñ saaqī
dekh to ḳhuun ġharīboñ kā tah-e-jām na ho

jaise zar kī pīlāhaT meñ mauj-e-ḳhūn utartī hai
zahr-e-zar ke tund nashe ne dīda-o-dil meñ utarnā hai

āshīqī-o-ḳhuddārī bandagī-o-ḳhud-bīnī
aarzū kī rāhoñ meñ ḳhūn-e-ārzū kiije

jhaTak rahī hai mirā ḳhuun apne dāman se
tumhārī teġh hai phir kyā vafā kī bū aa.e

ajab hai utre dam-e-zabh un kī aañkh meñ ḳhuun
kaTīñ kahāñ kī rageñ aur kahāñ lahū aa.e

ham ek tartīb se tumhārī udaas nazmoñ pe ro chuke haiñ
ki āñsuoñ aur ḳhuun ke beach DeḌh siskī kā sam rakhā thā

zaḳhm khāne se mire faḳhr-kunāñ hai ye dil
ḳhūn-e-dil se haiñ mire dīda-e-giryāñ nāzāñ

jab ye daave the ki har dukh kā mudāvā ho ga.e
kis liye tum bā.is-e-ḳhūn-e-tamannā ho ga.e

sher hotā hai shafaq meñ jo hinā rachtī hai
laala jab ḳhuun ugaltā hai ġhazal hotī hai

ḳhuun jab ashk meñ Dhaltā hai ġhazal hotī hai
jab bhī dil rañg badaltā hai ġhazal hotī hai

'sāqī' yādoñ kī fasdoñ se jiitā jiitā ḳhuun bahe
maiñ rañgoñ kī fasleñ kaaT ke aaj apne ghar laayā huuñ

vo shaḳhs to shab-ḳhūn meñ maarā gayā varna
us jaisā bahādur koī lashkar meñ nahīñ thā

dast-e-adū se shab jo vo sāġhar liyā kiye
kin hasratoñ se ḳhuun ham apnā piyā kiye

tilism-e-lafz-o-ma.ānī ke pher meñ phañs kar
ba-shakl-e-nazm-o-ġhazal ḳhūn-e-dil bahā rahā huuñ

yuuñ phir rahe haiñ jaise koī baat hī nahīñ
ālūda mere ḳhuun se dāmāñ kiye hue

dāman-e-vaqt pe ab ḳhuun ke chhīñTe na paḌeñ
ek markaz kī taraf dair-o-haram le ke chalo

har ḳhūn-e-jigar ke liye tayyār huuñ ab bhī
haarā huuñ na maiñ aur na haare haiñ ye aañsū

apne liye bahāyā ḳhūn-e-jigar to kyā ġham
tere liye to rañgīñ afsāna ho gayā maiñ

chāñd se paar koī raat baserā Daale
ham se pūchhe hai koī ḳhuun bahāyā apnā

abhī to lenā hai ham ko hisāb-e-shahr-e-qitāl
abhī to ḳhūn-e-gulū kā shumār baaqī hai