Tags-Khoon

hai ishāra yahī mū-hā-e-mizha kā un kī
ham vo nashtar haiñ ki jo ḳhūn-e-jigar lete haiñ

mahakte ḳhuun se sahrā jale hue gulshan
nazar-fareb haiñ duniyā ke ye nazzāre kyā

kahīñ bujh saktā hai 'māchis' ye mohabbat kā charāġh
jism kā ḳhuun hī jab tel huā jaatā hai

is qadar sarf ilāhī mire ḳhūn-e-dil kā
ab mohabbat kā bajaT fail huā jaatā hai

vo to ik sāzish thī mere ḳhuun kī mere ḳhilāf
jis ke sar ilzām aayā vo mirā qātil na thā

ḳhuun hī kī shirkat vo na kyuuñ ho shirkat chiiz hai jhagḌe kī
apnoñ se vo dekh rahā huuñ jo na kare begānā bhī

hote hote na huā misra-e-rañgīñ mauzūñ
band kyuuñ ho gayā ḳhūn-e-jigar aate aate

ḳhuun se sīñchī hai maiñ ne jo zamīñ mar mar ke
vo zamīñ ek sitam-gar ne kahā us kī hai

jab bhī kabhī shab-ḳhūn paḌā to ahl-e-chaman ḳhāmosh rahe
mausam-e-gul meñ jis ko dekho ''merī shāḳheñ'' ''mere gulāb''

ġharīboñ ke ḳhūn-e-jigar kī badaulat
amīroñ kā sūkhā huā halq tar hai

zaḳhm likhne ke liye maiñ ne likhī hai ġhaflat
ḳhuun likhnā thā magar maiñ ne harārat likkhā

rā.egāñ ḳhud ko na kar bazm-e-vafā meñ ai dil
yuuñ na āñkhoñ se Tapak ḳhūn-e-tamannā ho kar

ye apne ḳhuun kī lahroñ meñ Dūbtī kashtī
bhañvar se bhaag ke sāhil pe jā paḌī hogī

shāne kā bahut ḳhūn-e-jigar jaa.e hai pyāre
tab zulf kahīñ tā-ba-kamar jaa.e hai pyāre

partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām

uqāb-e-zulm ke panje abhī kahāñ TuuTe
abhī to fāḳhta-e-aman ḳhuun meñ tar hai

kitnā pur-haul hai māhaul shab-e-furqat kā
ḳhuun bhī ḳhushk huā jaatā hai shiryānoñ meñ

ab kyā batā.ūñ shahr ye kaisā lagā mujhe
har shaḳhs apne ḳhuun kā pyāsā lagā mujhe

rat-jagā ham bhī manā.eñ ki sunā hai ham ne
roz likhtī hai sahar ḳhuun se ahvāl us ke

har par-e-bulbul kuuñ ai ḳhūnīñ-nigāh
ḳhūn-e-gul siiñ karbalā karte ho tum