Tags-Ada

sitam ke ba.ad karam kī adā bhī ḳhuub rahī
jafā to ḳhair jafā thī vafā bhī ḳhuub rahī

apnī hī teġh-e-adā se aap ghāyal ho gayā
chāñd ne paanī meñ dekhā aur pāgal ho gayā

vo alag maiñ alag vo kahīñ haiñ kahīñ vāqa.ī ye to shāyān-e-ulfat nahīñ
vo adā-āshnā husn-e-nāz-āfrīñ be-niyāzī dikhā.e to maiñ kyā karūñ

rah-e-vafā meñ luTā kar matā-e-qalb-o-jigar
kiyā hai terī mohabbat kā haq adā maiñ ne

bhole-bhāle haiñ hasīñ nāz-o-adā kyā jāneñ
chāhne vaale hī kambaḳht sikhā dete haiñ

ye qarz-e-kaj-kulahī kab talak adā hogā
tabāh ho to ga.e haiñ ab aur kyā hogā

sar uThāte qubūliyat ke ba.ad
sajda-e-shauq yuuñ adā karte

vo kaisī aas thī adā jo kū-ba-kū liye phirī
vo kuchh to thā jo dil ko aaj tak kabhū milā nahīñ

bigaḌ ga.ī hai yahāñ be-tarah jahāñ kī tarah
kahāñ kī vaz.a kahāñ kī adā kahāñ kī tarah

e.ajāz-e-dil-farebī-e-andāz dekhnā
har har adā pe mujh ko gumān-e-nazar rahā

be-ḳhudī meñ dekhtā huuñ be-niyāzī kī adā
kyā fanā-e-zindagī ḳhud husn ban jaane meñ hai

vafā ḳhulūs adā husn zulf aur naġhma
ḳhudā kare yahī lahja ġhazal ko raas aa.e

kyā kamī hai ki nigāhoñ se gire jaate ho
dil meñ ghar karne kī tum ko to adā aatī hai

chāk-dāmānī-e-gul bar-sar-e-merāj-e-bahār
hai junūñ-ḳhez adā hosh kā da.avā karnā

daad chāheñge mirī tarah miTā kar kis ko
ishva-o-ġhamza-e-andāz-o-adā mere ba.ad

diloñ kā qarz raqmoñ se adā hotā nahīñ 'ḳhālid'
bahut āsāñ hai ye kahnā taqāzā nahīñ karte

shab ghar jo rahā mire vo mehmāñ
thā sub.h ye kis adā se kahnā

pursish kahoge kyā vahāñ jab yaañ ye sūrat hai
adā ik harf-e-vāda nāzukī se ho nahīñ saktā

ham āñkhoñ meñ aañsū nahīñ laate haiñ ki ham ne
paa.ī hai virāsat meñ adā aur tarah kī

us ne kuchh is adā se pazīrā.ī kī mirī
tahzīb-e-husn par maiñ sarāpā sipās thā