Tags-Ada

butoñ kī yaad meñ 'āzam' basar huī apnī
ḳhudā kī yaad kā farz ek din adā na huā

ye kyā ki be-sabab aa.e qazā javānī meñ
ye kyuuñ na ho ki tumhārī kisī adā pe mareñ

ḳhud-baḳhud be-ḳhud huā hai dekh kar tum kuuñ 'sirāj'
is qadar nāz-o-adā kā sehr-o-jādū mat karo

is dil ko kisī dast-e-adā-sanj meñ rakhnā
mumkin hai ye mīzān-e-kam-o-besh jalā de

duniyā tire qirtās pe kyā chhoḌ ga.e ham
ik husn-e-bayāñ husn-e-adā chhoḌ ga.e ham

ki ek saa.e kī narm aahaT ne rāstoñ kā nasīb badlā
koī ta.alluq ke chāñd lahje meñ apne-pan kī adā se bolā

adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

ek ḳhushbū kī tarah phailte haiñ mahfil meñ
aise alfāz adā jo tire lab se ho jaa.eñ

aañkh laḌānā sāmne aanā muñh dikhlānā aur chhup jaanā
ye bhī adā hai koī zālim maan ḳhudā ko mat de iizā

mujh ko shā.er na kaho 'mīr' ki sāhab maiñ ne
dard o ġham kitne kiye jam.a to dīvān kiyā

lafz kī qaid se rihā ho jā
aa mirī aañkh se adā ho jā

agarche har sarv-e-rāst-qāmat chaman meñ maġhrūr-e-sar-kashī hai
muqābil is qadd-e-ḳhush-adā ke mirī nazar meñ ġhulām haigā

ai mire sher apnī tābānī
dekh us shoḳh se adā ho kar

zālim mire jigar kuuñ kare kyuuñ na phāñk phāñk
sīkhā hai vo nigah kā paTā aur adā kā baañk

ehsān-e-tīr-e-yār adā ho sakegā kyā
jaan apnī nazr-e-lazzat-e-paikāñ hī kyuuñ na ho

badalte vaqt ne badle mizāj bhī kaise
tirī adā bhī ga.ī merā bāñkpan bhī gayā

tabassum kar ke yuuñ mujh se kahā us shoḳh ne o-be
idhar ko dekh adā se muskurānā is ko kahte haiñ

jis kī adā adā pe ho insāniyat ko naaz
mil jaa.e kaash aisā bashar DhūñDte haiñ ham

aañkh is adā se us ne dikhā.ī ki maiñ ne 'shauq'
chupke se apnā mai kā bharā jaam rakh diyā

shukr us kā adā karne kā ḳhayāl aa.e kise
abr jab itnā ghanā ho ki añdherā ho jaa.e