Tags-Ada

qarār kho ke chale be-qarār ho ke chale
adā adā pe tirī ham nisār ho ke chale

jaan dī dī huī usī kī thī
haq to yuuñ hai ki haq adā na huā

kaT ga.ī umr merī ġhaflat meñ
kuchh tirī bandagī adā na huī

aisā lagā ġharībī kī rekhā se huuñ buland
pūchhā kisī ne haal kuchh aisī adā ke saath

karam meñ maza hai sitam meñ adā hai
maiñ raazī huuñ jo tujh ko āsān ho kar

nāz-o-andāz-o-adā hoñToñ pe halkī sī hañsī
terī tasvīr meñ sab kuchh hai takallum to nahīñ

mastoñ ne is adā se kiyā raqs-e-nau-bahār
paimāna kyā ki vajd meñ mai-ḳhāna aa gayā

vo jis ke bojh se ḳham bhī na thī hamārī kamar
ham aaj aa.e haiñ vo qarz bhī adā kar ke

tū bhī kisī ke baab meñ ahd-shikan ho ġhāliban
maiñ ne bhī ek shaḳhs kā qarz adā nahīñ kiyā

mire sulūk kī qīmat yahīñ adā kar de
mujhe gunāh kī lazzat se āshnā kar de

ān-o-adā meñ Thor hī rakhtā hai ḳhalq ko
apne to fan meñ ek vo kāmil aziiz hai

vo nigāh kaisī nigāh thī ki 'shamīm' se vo na chhup sake
ye adā bhī qābil-e-dīd hai jo mile to bach ke guzar ga.e

ye aamad hai ki aafat hai nigah kuchh hai adā kuchh hai
ilāhī ḳhair mujh se āshnā begāna aatā hai

apnī adā se aap jhijaknā apnī havā se aap khaTaknā
chaal meñ laġhzish muñh pe hayā.eñ uf rī javānī haa.e zamāne

terī ek ek adā pahchānī
apnī ek ek ḳhatā maan ga.e

ḳhuub hai sāhab-e-mahfil kī adā
koī bolā to burā maan ga.e

parda-dār-e-sādgī hai har adā
ye tasanño be-zarūrat hī sahī

ye kaise zabān se adā hoñ
ḳhāke jo diloñ meñ an-kahe haiñ

adā se haath uThte haiñ gul-e-rākhī jo hilte haiñ
kaleje dekhne vāloñ ke kyā kyā aah chhilte haiñ

jis adā kā kushta huuñ maiñ vo rahe mere hī saath
us adā ko mubtazil ai ḳhūb-rū mat kījiyo