Tags-Ada

vo kaj-adā sahī mirī pahchān bhī thā vo
apne nashe meñ mast jo fankār mujh meñ thā

us adā kā huuñ maiñ dīvāna ki añgḌā.ī le
mujh se kahtā hai kahīñ jā.iye aur so rahiye

kaunain pe bhārī hai allāh re ġhurūr un kā
itne bhī adā vaale maġhrūr nahīñ hote

sadqe tire ai rūh-e-adā paik-e-latāfat
ḳhush aa.e tire husn ko ye kaif kī saa.at

ḳhūn-e-jigar se umr bhar qarz-e-hayāt adā kiyā
phir bhī yahī sunā kiye roz-e-hisāb aur hai

chaal hai mast nazar mast adā meñ mastī
jaise aate haiñ vo TuuTe ho.e mai-ḳhāne ko

ek adā roz na.ī kartā hai ījād
roz na.e Dhañg se ayyārī kartā hai

nahīñ bhātā mujhe koī rashk-e-parī koī laakh hasīñ ho balā se mirī
mirā dil tirā āshiq-e-shefta hai mujhe tere hī nāz-o-adā kī qasam

log kahte haiñ jise husn-e-adā kī shoḳhī
yahī rañgīn ishāroñ kā bayāñ hotī hai

safārat-e-had-e-hairāngī pe huuñ māmūr
nigār-ḳhāna-e-husn-o-adā ko jaatā huuñ

hijābāt-e-jahāñ se har adā chhan chhan kī aatī hai
ġharaz parde se un kī jalva-sāmānī nahīñ jaatī

va.ade kī raat aa.ī qazā is adā ke saath
dhoke meñ tere us se ham-āġhosh ho ga.e

koī kirdār adā kartā hai qīmat is kī
jab kahānī ko nayā moḌ diyā jaatā hai

ham se bad-tar koī fankār jahāñ meñ hogā
ham adā-kāriyāñ karte haiñ adākārī kī

kyuuñ ho bahāna-jū na qazā sar se paañv tak
zālim haiñ aap kī hai adā sar se paañv tak

muñh chāñd us pe zulf-e-rasā sar se paañv tak
kyuuñ loT-poT ho na adā sar se paañv tak

ghere thī tujh ko barq-e-adā sar se paañv tak
kyuuñ naḳhl-e-tūr jal na gayā sar se paañv tak

aur baḌh jaatī hai kuchh lafz-o-bayāñ kī tāsīr
lafz jab ashk kī sūrat meñ adā hotā hai

qurbat ke mausamoñ kī adā yaad rah ga.ī
guzrī rafāqatoñ kā asar bhūlne lage

vo go sunā kiye lekin adā ye kahtī rahī
na zikr-e-mehr-o-vafā mere rū-ba-rū nikle