Tags-Ada

husn majbūr-e-jafā hai shāyad
ye bhī ik tarz-e-adā hai shāyad

tum se takmīl-e-jaur ho na sakī
is adā kā bhī haq adā na huā

baat kā aur bhī ho saktā hai matlab aur phir
lafz tabdīl bhī hotā hai adā hote hue

kyā kyā milā hai zindagī-e-be-sabāt se
kaliyoñ se pūchh ġhuncha-e-rañgīñ-adā se pūchh

kis tarah kināroñ ko hai siine se lagā.e
Thahre hue paanī kī adā tum bhī to dekho

laboñ se harf-e-mohabbat adā nahīñ hotā
nazar nazar se savāl-o-javāb hotā hai

kisī kā ġhamza sharāboñ se chuur qaus-e-quzah
adā ġhurūr javānī surūr ishva-garī

jo namāz aaj sar-e-dār adā kī maiñ ne
sajda-e-shukr kā me.aar huī jaatī hai

kaaba o quds meñ ghar kiyā ye bhī
ik adā hai mire harjā.ī kī

dil meñ mire chuTkī lī aisī hai ki dard uTThā
ma.aqūl che ḳhush ai vaah aap is ko adā samjhe

haal apnā har ik se chhupāte rahe zaḳhm khāte rahe muskurāte rahe
terī tash.hīr ham ne gavārā na kī dard-e-dil ham tirā haq adā kar chale

tum ne hañste mujhe dekhā hai tumheñ kyā ma.alūm
karnī paḌtī hai adā kitnī hañsī kī qīmat

adā-o-nāz meñ kuchh kuchh jo hosh us ne sambhālā hai
to apne husn kā kyā kyā diloñ meñ shor Daalā hai

ham ban ga.e haiñ adā tumhārī
chheḌoge to ruuTh jā.eñge ham

husn kī ye adā bhī hai kitnī hasīñ ik tabassum meñ sab kuchh hai kuchh bhī nahīñ
apnī apnī samajh apnā apnā yaqīñ har savāl nazar kā javāb aa gayā

be-ḳhud bhī haiñ hoshiyār bhī haiñ dekhne vaale
in mast nigāhoñ kī adā aur hī kuchh hai

dekh kar bhī na dekhnā us kā
ye adā to butoñ meñ hotī hai

ab kahāñ shauq ko miltā hai baḌhāvā 'ja.afar'
narm palkoñ meñ ghulī ek adā thī kal tak

harīm-e-nāz ko sūrat-parast kyā jaane
adā-shanās faqat dil kī be-ḳhudī hogī

dam-ba-ḳhud merī anā terī adā bhī dam-ba-ḳhud
tere pahlū meñ rahā maiñ aur rahā bhī dam-ba-ḳhud