Tags-Khudi

ye fikr kar ki in āsūdgī ke dhokoñ meñ
tirī ḳhudī ko bhī maut aa ga.ī to kyā hogā

bā.is-e-shorish-e-kaunain hai insāñ kī ḳhudī
be-ḳhudī morid-e-ilzām huī jaatī hai

ḳhudī se is tilism-e-rañg-o-bū ko toḌ sakte haiñ
yahī tauhīd thī jis ko na tū samjhā na maiñ samjhā

pūchho na ham se ziist kā lutf aa gayā hameñ
jis din se rū-shanās hue be-ḳhudī se ham

girāñ-bahā hai to hifz-e-ḳhudī se hai varna
guhar meñ āb-e-guhar ke sivā kuchh aur nahīñ

maiñ kin majbūriyoñ kā ab karūñ mātam batā 'bāliġh'
jo paayā be-ḳhudī meñ vo gañvāyā āshnā ho kar

vo ālam-e-be-ḳhudī ho dil par vo kaifiyat be-hisī kī chhā.e
jo ārzū-e-karam miTā de jo be-niyāz-e-itāb kar de

ḳhud-farāmoshī kī lazzat nā-mukammal rah ga.ī
bāvajūd-e-be-ḳhudī terā ḳhayāl aa hī gayā

apnā rahā na hosh jab rāz-e-hayāt pā liyā
nemat-e-be-ḳhudī samajh hosh kā ye samar nahīñ

fanā tālīm-e-dars-e-be-ḳhudī huuñ us zamāne se
ki majnūñ laam alif likhtā thā dīvār-e-dabistāñ par

ek mauhūm sā tūfān-e-ḳhudī
kuchh nahīñ josh-e-javānī kyā hai

haa.e ye be-ḳhudī ishq ko ma.alūm nahīñ
kaun aayā hai kab aayā hai kahāñ aayā hai

vahīñ pe jā ke rukī aaj be-ḳhudī apnī
jahāñ pe moḌ mohabbat kī dāstāñ kā thā

vaah 'mā.il' ḳhudī meñ zikr-e-anā
chup raho tum ye guftugū hai abas

roz ik rāsta badaltā hai
merā dil be-ḳhudī meñ chaltā hai

ba-qadr-e-paimāna-e-taḳhayyul surūr har dil meñ hai ḳhudī kā
agar na ho ye fareb-e-paiham to dam nikal jaa.e aadmī kā

be-ḳhudī achchhī thī ab to āgahī kī shakl meñ
ġham hī ġham nā-vāqif-e-anjām le kar aa.e haiñ

ye be-ḳhudī hai mire aish-e-zindagī kī kafīl
nigāh-e-shauq abhī mahv-e-rū-e-jānāñ hai

mai-e-hayāt meñ shāmil hai talḳhī-e-daurāñ
jabhī to pī ke taraste haiñ be-ḳhudī ke liye