Tags-Khudi

ga.ī bahār magar apnī be-ḳhudī hai vahī
samajh rahā huuñ ki ab tak bahār baaqī hai

ye fasl-e-bahār be-ḳhudī kā
rasta ham ko batā rahī hai

mire dosto na dekho mujhe chashm-e-ḳhashmagīñ se
ki rahīn-e-bāda-noshī mirī be-ḳhudī nahīñ hai

karūñ kyā bayān maiñ vasf ab mai-e-nāb-e-ishq kā dosto
ki ḳhudī kī qaid se yak-qalam ba-ḳhudā ki mujh ko chhuḌā diyā

sun kabhī be-ḳhudī meñ karte haiñ
be-ḳhabar log bā-ḳhabar bāteñ

mizāj-e-husn ko bhaa.ī na bandagī merī
niyāz-e-ishq meñ shāmil rahī ḳhudī merī

mere ehsās-e-ḳhudī par na koī zad aa.e
tū jo de de mujhe be-harf savāl achchhā hai

vo be-ḳhudī thī mohabbat kī be-ruḳhī to na thī
pe us ko tark-e-ta.alluq ko ik bahāna huā

vahshī-e-dasht-e-be-ḳhudī hai 'sirāj'
garche aalam ke nizd shahrī hai

dīda-e-ḳhūñ-nāba-afshāñ merā un ke sāmne
be-ḳhudī ke haath se chhūTā huā ik jaam thā

hañgāma-e-ḳhudī se tū be-niyāz ho jā
gum ho ke be-ḳhudī meñ āgāh-e-rāz ho jā

be-ḳhudī meñ bhī raqābat kā magar hai ehsās
ek sahrā meñ hai dīvāne se dīvāna judā

mai-e-hayāt meñ shāmil hai talḳhī-e-daurāñ
jabhī to pī ke taraste haiñ be-ḳhudī ke liye

be-niyāz-e-bandagī-e-shauq thī merī ḳhudī
be-ḳhudī meñ ehtirām-e-āstāñ samjhā thā maiñ

be-ḳhudī meñ pahlū-e-iqrār pahle to na thā
itnā ġhāfil vo but-e-ayyār pahle to na thā

nigāh-e-dost ne baḳhshī jo dil ko mad-hoshī
sharāb-o-jām se ham ko vo be-ḳhudī na milī

ai 'shakīl' rūh-parvar tirī be-ḳhudī ke naġhme
magar aaj tak na ham ne tire lab pe jaam dekhā

ḳhirman-e-kā.enāt ko phūñk na de yahī sharār
soz hī soz hī faqat merī ḳhudī kī saaz meñ

yā to ḳhudī ko bhuul jā yā phir usī ko bhuul jā
hiss-e-muġhā.irat na rakh bārgah-e-niyāz meñ

rāz-e-nizām-e-kā.enāt un kī nigāh-e-nāz meñ
asliyyat-e-ḳhudā nihāñ merī ḳhudī kī raaz meñ