Tags-Khushi

bas ik lamha lagātī hai ḳhushī aa kar guzarne meñ
udāsī aa.e to sadiyoñ kī miTTī chhān letī hai

ḳhushī to de hī detī hai tirī duniyā mujhe lā kar
magar badle meñ vo us ke mirā īmān letī hai

yuuñ ḳhushī kī havas na jā.egī
ek ik ġham ko be-naqāb karo

vo haath meñ talvār liye sar pe khaḌe haiñ
marne nahīñ detī mujhe marne kī ḳhushī aaj

ziddain-e-kaifiyāt ko ham ne sulā diyā
jiite rahe ḳhushī se ġham-e-āshiqī liye

baḌī ajiib ḳhushī hai ġham-e-mohabbat bhī
hañsī laboñ pe magar dil pe choT khaa.e hue

vo chashm mā.il-e-lutf-o-karam huī bhī to kab
ujaḌ chukā hai dil apnī ḳhushī milī bhī to kab

samāñ ho ḳhushī kā yā ġham kā ho mausam
ham apnā fasāna sunāte raheñge

sahnī bhī jafā un kī karnī bhī vafā un se
un kī bhī ḳhushī karnī dil kā bhī kahā karnā

ye navāzisheñ tirī bāġhbāñ ki kahīñ kā maiñ nahīñ rah gayā
na vo rañj-e-daur-e-ḳhizāñ rahā na vo fasl-e-gul kī ḳhushī rahī

mirī zindagī kā ye haal thā yahī shakl-e-rāh-ravī rahī
ki na ġham kā ġham hī rahā kabhī na ḳhushī kī mujh ko ḳhushī rahī

itnī ḳhushī milī ki sambhālī nahīñ ga.ī
do-chār lamhe mujh pe luTāne kā shukriya

ye shahr vo hai ki koī ḳhushī to kyā detā
kisī ne dil bhī dukhāyā nahīñ bahut din se

vo ta.alluq hai tire ġham se ki allāh allāh
ham ko hāsil ho ḳhushī bhī to gavārā na kareñ

jahāñ ġham hai na ab koī ḳhushī hai
mohabbat us jagah par aa ga.ī hai

ġham nahīñ gar ḳhushī nahīñ hāsil
furqat-e-dost kā malāl to hai

teġh lahū meñ Duubī thī aur peḌ ḳhushī se jhūmā thā
bād-e-bahārī chalī jhuum ke jab us ne mujh ko dekhā thā

sach ke liye ham aaj ke suqrāt ban ga.e
piite haiñ jaam zahr kā apnī ḳhushī se ham

mānūs ho ga.e haiñ ġham-e-zindagī se ham
ham ko ḳhushī mile to na leñge ḳhushī se ham

ġham khāte khāte ho gayā mānūs-e-ġham mizāj
ho jaate haiñ fasurda-o-mahvar ḳhushī se ham