Tags-Khushi

hasīñ zindagī kī talāsh thī hameñ sarḳhushī kī talāsh thī
hue zindagī se jo āshnā to jarāhatoñ se bahal ga.e

ġham ho ki ḳhushī donoñ kuchh duur ke sāthī haiñ
phir rasta hī rasta hai hañsnā hai na ronā hai

ḳhushī kā kyā hai hamesha fareb detī hai
to apne ġham ko hī ab mo'atabar banāyā jaa.e

sarḳhushī ban na sakī zahr-e-alam kā tiryāk
zindagī talḳhī-e-hālāt se aage na baḌhī

kabhī vo tabassum-e-zer-e-lab kabhī ḳhāmushī se vo be-sabab
kabhī sarḳhushī kabhī aañkh nam tumheñ yaad ho ki na yaad ho

vo mirī ḳhushī se haiñ ḳhush-gumāñ ki nashāt-e-zīst hai mudda.ā
mire ashk-e-ġham kā rukā huā kabhī qāfila bhī to dekhte

vahī hai ālam-e-afsurdagī vahī ham haiñ
ḳhushī kā jis meñ guzar ho vo dil kahāñ apnā

maiñ tujhe dil meñ basā luuñ magar itnā to batā
tū ḳhushī meñ mire sadmāt badal saktī hai

haath aa.e ḳhushī to ḳhush holo
dil ho ġhamgīñ to aañkh nam na karo

vāqif nahīñ ki paañv meñ paḌtī haiñ beḌiyāñ
dūlhe ko ye ḳhushī hai ki merī barāt hai

pahle ġham se nihāl kartā thā
ab ḳhushī se nihāl kar Daalā

ab ke us ne kamāl kar Daalā
ik ḳhushī se niDhāl kar Daalā

muqaddar par huā huuñ jab se maiñ raazī usī din se
ḳhushī ho yā ki ġham chehre kī tābānī nahīñ jaatī

ḳhushī meñ bhī navā-sañj-e-fuġhāñ huuñ
zamīn-o-āsmāñ kā tarz-dāñ huuñ

ġham par haiñ ta.ana-zan to ḳhushī bhī nibhā.iye
sarkār merī bāda-kashī bhī nibhā.iye

har ḳhushī kā mazā ġham kī nisbat se hai
ġham nahīñ hai agar to mazā kuchh nahīñ

udāsī ne samāñ bāñdhā huā hai
ḳhushī ke saath phir dhoka huā hai

mujhe talab hī nahīñ hai kisī masarrat kī
ḳhushī samajh ke tirā ġham uThā rahā huuñ maiñ

hazār shukr ki 'inshā' kisī kī mahfil meñ
ḳhafā se aa.e the par ho hañsī-ḳhushī nikle

aalam meñ hai ghar ghar ḳhushī-o-aish par us bin
mātam-kada ham ko nazar aatā hai ghar apnā