Tags-Khushi

zamāna merī hañsī ko ḳhushī samajhtā hai
maiñ muskurā ke jo ḳhud ko fareb detā huuñ

kaun sī aisī ḳhushī hai jo milī ho ik baar
aur tā-umr hameñ jis ne aziyyat nahīñ dī

huuñ mutma.in ki huuñ āsūda-e-ġham-e-jānāñ
majāl kyā ki ḳhushī dekhe aañkh bhar ke mujhe

karam ke is daur-e-imtihāñ se vo daur-e-mashq-e-sitam hī achchhā
na zindagī kī ḳhushī hī achchhī na be-sabātī kā ġham hī achchhā

hijr meñ aish-e-guzishta kā ḳhayāl achchhā hai
ho jhalak jis meñ ḳhushī kī vo ma.aal achchhā hai

ab ke har shahr meñ phailā hai jo tā.ūn 'hafīz'
marne vāloñ ko ḳhushī hai ki ye saal achchhā hai

tere aane se yū ḳhushī hai dil
juuñ ki bulbul bahār kī ḳhātir

ham pe vo vaqt hai ab chāhe ḳhushī aa.e ki ġham
aañkh nam hotī hai jazbāt badal jaate haiñ

ḳhushī se kaun kartā hai ġhamoñ kī parvarish 'sājid'
kise hai shauq logo dard ke sāñche meñ Dhalne kā

ab ġham kā koī ġham na ḳhushī kī ḳhushī mujhe
āḳhir ko raas aa hī ga.ī zindagī mujhe

jahāñ ke dard ko 'anvār' ne sameT liyā
maiñ ik ḳhushī kī tamannā meñ mar-miTā hī sahī

ḳhushī ke ta.āqub meñ hai ġham yahāñ
ye duniyā jahannum hai jannat nahīñ

shu.ūr chāhiye izhār-o-āgahī ke liye
ḳhushī hai ġham ke liye aur ġham ḳhushī ke liye

vasl kī shīrīnī meñ pinhāñ hijr kī talḳhī bhī hai kam kam
tum se milne kī bhī ḳhushī hai tum se judā hone kā bhī ġham

kyā batā.eñ ham dil par 'shād' kyā guzartī hai
ġham chhupānā paḌtā hai jab ḳhushī ke paikar meñ

kitne dinoñ ke ba.ad ḳhushī se mile haiñ ham
phir bhī ajiib baat hai ham ro nahīñ rahe

maiñ to sarā-e-shauq meñ dil kā kañval jalā chukā
ab ye tirī ḳhushī ki tū dekh ki raushnī na dekh

phir de ke ḳhushī ham use nāshād kareñ kyuuñ
ġham hī se tabī.at hai agar shaad kisī kī

har ḳhushī maqbaroñ pe likh dī hai
aur udāsī gharoñ pe likh dī hai

bahut bār-e-garāñ ye zindagī ma.alūm hotī hai
ki ġham kā pesh-ḳhema har ḳhushī ma.alūm hotī hai