Tags-Khushi

mil jaa.e mujh ko ḳhaak jo qadmoñ kī aap ke
dil kyā hai maiñ to jaan bhī de duuñ ḳhushī ke saath

duniyā se kaun jaatā hai apnī ḳhushī ke saath
vābasta ho agar na azal zindagī ke saath

qismat meñ ḳhushī jitnī thī huī aur ġham bhī hai jitnā honā hai
ghar phūñk tamāshā dekh chuke ab jañgal jañgal ronā hai

ḳhushī kī rut ho ki ġham kā mausam nazar use DhūñDtī hai har dam
vo bū-e-gul thā ki naġhma-e-jāñ mire to dil meñ utar gayā vo

nahīñ detā jo mai achchhā na de terī ḳhushī saaqī
piyāle kuchh hamesha taaq par rakkhe nahīñ rahte

ahbāb ko de rahā huuñ dhokā
chehre pe ḳhushī sajā rahā huuñ

kuchh to havā bhī sard thī kuchh thā tirā ḳhayāl bhī
dil ko ḳhushī ke saath saath hotā rahā malāl bhī

maiñ kaisī sā.at-e-bad-baḳht meñ muqayyad huuñ
duā ḳhushī kī hai zāhir asar malāl kā hai

pyāre beTe tū ne iiñT gaare cement aur sariye vaalā makān to banā liyā hai
merī duā hai ki ye mohabbat amn ḳhushī aur ḳhush-hāl se bharā ghar ban jaa.e

nuqūsh-e-hasrat miTā ke uThnā, ḳhushī kā parcham uḌā ke uThnā
milā ke sar baiThnā mubārak tarāna-e-fat.h gā ke uThnā

aañsū bhar aa.e dil bhar aayā
gar naam bhī sun liyā ḳhushī kā

chand lamhāt kī ḳhushī ke liye
log barsoñ udaas rahte haiñ

phir dil ne mire ġham aur ḳhushī ko
rassī kī tarah se baT ke dekhā

vo haath meñ talvār liye sar pe khaḌe haiñ
marne nahīñ detī mujhe marne kī ḳhushī aaj

kyā vasl ke iqrār pe mujh ko ho ḳhushī aaj
is kī bhī ye sūrat hai kabhī kal hai kabhī aaj

safed-poshī-e-dil kā bharam bhī rakhnā hai
tirī ḳhushī ke liye terā ġham bhī rakhnā hai

mere ġhurbat ke dinoñ meñ hausla de jā.egā
dost mere tū ḳhushī kī ik sadā de jā.egā

tumheñ jab lauTnā ho ḳhushī se lauT aanā
vafā qaa.em milūñgā yahī maiñ tai-shuda maiñ

ḳhushī ke lamhe to jūñ-tūñ guzar ga.e haiñ yahāñ par
bas ek sā.at-e-ġham kāTnī muhāl huī hai

jo bahār fasl-e-shabāb thī vo misāl-e-abr guzar ga.ī
nahīñ zindagī meñ koī ḳhushī ki ḳhilāf mere havā bhī hai