Tags-Khushi

apnī duniyā meñ ḳhushī aa.ī to aaise aa.ī
jaise ik naqsh bane bante hī phir miT jaa.e

na bīm-e-marg na ḳhauf-e-ajal na ranj koī
ḳhushī se karte hue raqs kaj-kulāh chale

kise aziiz nahīñ hogī zindagī merī
kisī pe baar hī kab thī yahāñ ḳhushī merī

chand kaliyāñ nashāt kī chun kar muddatoñ mahv-e-yās rahtā huuñ
terā milnā ḳhushī kī baat sahī tujh se mil kar udaas rahtā huuñ

chand saa.at bhī ḳhushī kī apnī qismat meñ kahāñ
raas kab aayā hai mujh ko shādmānī kā libās

ḳhabar liyāyā hai hudhud mere ta.iiñ us yār-e-jānī kā
ḳhushī kā vaqt hai zāhir karūñ rāz-e-nihānī kā

na aa.ī jāgtī āñkhoñ ke dā.ere meñ kabhī
ye bad-nasīb kā ik ḳhvāb hai ḳhushī kyā hai

jo āñsuoñ ko na chamkā.e vo ḳhushī kyā hai
na aa.e maut pe ġhālib to zindagī kyā hai

ik an-jānī ḳhushī ke āsare meñ
hameñ har ġham gavārā ho gayā hai

ham us kūche se nisbat kī ḳhushī kaise sambhāleñ
hamārā naam us ke ḳhār-o-ḳhas meñ aa gayā hai

koī taaza alam na dikhlā.e
aane vaale ḳhushī se Darte haiñ

rumūz-e-zīst se vāqif huā hai jo insāñ
baqā-e-zīst kī us ko ḳhushī nahīñ hotī

ḳhushī señ charḳh meñ hai āftāb kī mānind
milā jise mai-e-nūr-e-jamāl kā shīsha

'anjum'-e-soḳhta-jāñ ko hai ḳhushī kī ummīd
raat meñ jaise kabhī rañg-e-sahar hotā hai

rañj o alam tanhā.ī ke sāthī guzar basar ko kaafī haiñ
ḳhushī to shāmil ho jaatī hai aa.e ga.e mehmānoñ meñ

mahshar meñ bhī vo ahd-e-vafā se mukar ga.e
jis kī ḳhushī thī ab vo qayāmat nahīñ rahī

ḳhushī ke ba.ad ik tū hī nahīñ hai mubtalā-e-ġham
yūñhī akasr jahāñ meñ ai dil-e-nāshād, hotā hai

zindagī se ḳhushī kī hai ummīd
par ye ummīd bhī zarā sī hai

rañj-o-ḳhushī 'sartāj' baham haiñ ye duniyā kī mahfil hai
ġham kī tāneñ kahīñ pe jāgeñ shor kahīñ shahnā.ī kā

mujhe ġhurūr hai maiñ dostoñ kī nekī huuñ
unheñ ḳhushī hai ki dariyā meñ Daal aa.e the