Tags-Khushi

ik ḳhushī suud par milī thī kahīñ
us kā qarza utārnā hai mujhe

agar tū saath chal paḌtā safar āsān ho jaatā
ḳhushī se umr bhar jiine kā ik sāmān ho jaatā

ḳhushī se mujh pe kyā jaane guzar jaanī thī phir 'hāmid'
ghaḌī pal ko bhī tū mujh par jo kuchh qurbān ho jaatā

dast-bardār zindagī se huā
aur ye saudā mirī ḳhushī se huā

kabhī to ham pe khuleñge ḳhushī ke darvāze
isī umiid pe ham tere ġham uThā.e ga.e

jitnī mil jaa.e ḳhushī lete raho
ġham agar mushkil hai sahnā chhoḌ do

kaun sī aisī ḳhushī hai jo milī ho ek baar
aur tā-umr hameñ jis ne aziyyat nahīñ dī

maiñ kahāñ thā jab farishtoñ ne ḳhushī insāñ ko dī
kyuuñ mire hisse meñ aa.eñ sirf ashk-ārā.iyāñ

qarīb laane kī tarġhīb dene vaale dekh
tirī ḳhushī meñ mirī zindagī bhī jaatī rahī

shikasta-dil kī ḳhushī dosto ḳhushī to na thī
hañsī pe vaqt ke ik tanz thā hañsī to na thī

merī āñkhoñ se nikal aa.e ḳhushī ke aañsū
beTī ruḳhsat jo huī gūñjtī shahnā.ī meñ

ghar meñ mehmāñ agar aa.eñ to ḳhushī hotī hai
maiñ kasar kuchh nahīñ rakhtā huuñ pazīrā.ī meñ

daadī bhī thiiñ bahut ḳhush bachchoñ kī is ḳhushī se
detī thiiñ vo duā.eñ bachchoñ ko jān-o-jī se

chaḌhtā hai 'kañval' kaun salīboñ pe ḳhushī se
sab log masīhā ke to autār nahīñ haiñ

ḳhud maiñ apnā dukhā rahā huuñ dil
is meñ lekin ḳhushī usī kī hai

kisī haal meñ bhī rakhe rakhne vaalā
bhalā dahr meñ kyā ḳhushī aur kyā ġham

ye kyā jaadū hai vo jab bhī mire milne ko aatā hai
ḳhushī se ghar ke sab dīvār aur dar bol uThte haiñ

tire va.ade par jiye ham to ye jaan jhuuT jaanā
ki ḳhushī se mar na jaate agar e'tibār hotā

ba-har-unvāñ mohabbat ko bahār-e-zindagī kahiye
qarīn-e-maslahat hai us ke har ġham ko ḳhushī kahiye

ḳhushī se 'abr' har ik rabt munqata.a kar do
agar kahī koī duniyā meñ sogvār mile