Tags-Khushi

dil-e-hazīñ ko tamannā hai muskurāne kī
ye rut ḳhushī kī hai yā riit hai zamāne kī

vo jo māñge to jaan bhī de duuñ
jī rahā huuñ isī ḳhushī ke liye

kam nahīñ ye bhī zindagī ke liye
jaan jaa.e tirī ḳhushī ke liye

hamāre paas thā kyā aur matā-e-dil ke sivā
tire savāl pe vo bhī ḳhushī ḳhushī de dī

ik huuk sī uThtī hai sar-e-bām-e-tamannā
vo merī ḳhushī se kabhī rahtā mire dil meñ

chahak rahe haiñ chaman meñ bulbul mahak rahe haiñ khule hue kul
chhalak rahe haiñ piyāla-e-mul ḳhushī hai abr-e-bahār aayā

vo mil gayā hai to kyā qissa-e-firāq kaheñ
ḳhushī ke lamhoñ ko yuuñ be-mazā nahīñ karte

ḳhushī ke vaqt bhī tujh ko malāl kaisā hai
urūj-e-husn meñ naqs-e-kamāl kaisā hai

kumlā.e haiñ yahāñ pe mirī zindagī ke phuul
in rāstoñ meñ dafn haiñ merī ḳhushī ke phuul

tumhīñ ho ta.ana-zan mujh par tumhīñ insāf se kah do
koī apnī ḳhushī se ḳhānamāñ-barbād hotā hai

ye jiit kam hai ki ġham raas aa gayā varna
ḳhushī ḳhushī koī jhelā hai apnī maat kā karb

dukh agar the mire tavīl bahut
to ḳhushī do minute ga.ī hogī

hamesha tañg rahā mujh pe zindagī kā libās
kabhī khilā na mire jism par ḳhushī kā libās

sarf kartā kis ḳhushī se jā ke us meñ apnī ḳhaak
kyā kahūñ jis din banā.ī karbalā thī maiñ na thā

ab na paimāne meñ tasvīr tirī utregī
ab na dil se koī nāzuk sī ḳhushī guzregī

ḳhushī mahsūs kartā huuñ na ġham mahsūs kartā huuñ
bahr-ālam tumhārā hī karam mahsūs kartā huuñ

dil ke dariyā se har ḳhushī 'amjad'
ek girdāb kī tarah guzrī

ne.amat-e-ġham merā hissa mujh ko de de ai ḳhudā
jama.a rakh merī ḳhushī saare zamāne ke liye

aañkh hañste hañste kyuuñ rone lagī
har ḳhushī kartī hai bas ġhamgīn kyā

vo zahr-e-ḳhand jo ghole haiñ chashm o lab ne tire
tujhe ḳhushī ho to pūchheñ ki zer-e-lab kyā hai