Tags-Khushi

ye zindagī bhī ajab zindagī hai kyā kahiye
'matīn' Thokareñ khāte haiñ ham ḳhushī ke liye

hamāre hāl-e-pareshāñ pe kaash ek nazar
bhare haiñ ruup ye ham ne tirī ḳhushī ke liye

'rashīd' lab pe hañsī hai to aañkh nam kar le
na.ī ḳhushī ke muqābil purānā ġham bhī to ho

nigār-ḳhāna-e-hastī kā saath do 'raunaq'
ḳhushī ke sāmne tasvīr-e-dard ban jaao

ḳhushī se apnā ghar ābād kar ke
bahut ro.eñge tum ko yaad kar ke

ḳhushī to hastī-e-nā-mo.atabar na degī 'vaqār'
jo rishta ġham se hai vo phir bhī mo'atabar hai miyāñ

ham to ik din na jiye apnī ḳhushī se ai dil
aur hoñge tire ehsān uThāne vaale

hovegā rañj yā ḳhushī hogī
kyuuñ phaḌakne lagī hamārī aañkh

dil apnā jalāyā hai kisī ne bhī ḳhushī se
ban jaatī hai jī par to guzar jaate haiñ jī se

jo ḳhush haiñ vo ḳhushī meñ kaaTe haiñ raat saarī
jo ġham meñ haiñ unhoñ par guzre hai raat bhārī

mirī har ḳhushī ḳhushī thī tirī har ḳhushī se pahle
mujhe koī ġham nahīñ thā ġham-e-āshiqī se pahle

Dare to kaT na sakegā kabhī galā merā
yahī ḳhushī ho to āñkhoñ pe haath dhar lenā

jab se ḳhushī salīb-e-mohabbat pe chaḌh ga.ī
hañsnā bhī ab udhār meñ laanā paḌā hameñ

ġham-o-ḳhushī bhī to ik nasha hai sambhalnā āsāñ nahīñ hai 'ḳhālid'
binā piye bhī qadam hamāre jo aaj bahke to log samjhe

jhūTī sachchī kī nahīñ fikr ḳhushī to ye hai
un ko aadat hai mire sar kī qasam khāne kī

kis ḳhushī meñ haa.e kaisā ranj phailā kyā karūñ
kyā ḳhabar thī hañste hañste vo ḳhafā ho jā.egā

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo

hasīn chehre kī tābindagī mubārak ho
tujhe ye sāl-girah kī ḳhushī mubārak ho

yahī hai dāvat-e-aish-o-nishāt roz-o-shab
ḳhushī kā zikr nahīñ ashk-bār haiñ ham log

ḳhushī kā nuur to ik-bārgī milā hai tumheñ
hameñ to ġham ke añdhere bhī qist-vār mile