Tags-Khushi

na vo umr hai na masarrateñ na vo aish hai na vo ishrateñ
na vo ārzūeñ na hasrateñ na ḳhushī kā nām-o-nishāñ rahā

ġham aur ḳhushī meñ farq na mahsūs ho jahāñ
maiñ dil ko us maqām pe laatā chalā gayā

ḳharāb-e-dard hue ġham-parastiyoñ meñ rahe
ḳhushī kī khoj bahāna thī mastiyoñ meñ rahe

maiñ ḳhushī meñ ghir ke udaas huuñ
koī aur is kā sabab nahīñ

kitābat se na jo sīkhā vo duniyā ne sikhāyā hai
ḳhushī kitnī bajā ho dard se pinhāñ nikaltī hai

dil ko ehsās ke us moḌ pe laa.ī hai hayāt
ab na merī hai ḳhushī aur na ġham merā hai

chauñk paḌtā huuñ ḳhushī se jo vo aa jaate haiñ
ḳhvāb meñ ḳhvāb kī ta.abīr bigaḌ jaatī hai

tujhe chand roza ḳhushī milī to milā mujhe ġham-e-dā.imī
vo tirī nazar kī talāsh thī ye mirī nazar kī talāsh hai

ek dilkash zahr se labrez paimāne kā naam
zindagī kyā hai ḳhushī se jal ke mar jaane kā naam

khulā hai bāb-e-qafas to is par ḳhushī kā iz.hār kar rahe ho
milī hai jis ko rihā.ī mahrūm-e-bāl-o-par hai sitam to ye hai

dukhoñ ke yaar bichhaḌne lage haiñ ab mujh se
ye sāneha bhī huā hai ḳhushī ke aane se

rumūz-e-ġham se begāne ḳhushī kā raaz kyā jāneñ
qazā se Darne vaale zindagī kā raaz kyā jāneñ

tūl-e-shab-e-firāq se kam the ḳhushī ke māh-o-sāl
vasl kī ek umr ko hijr kā ek pal kahūñ

mire ġhamoñ se sarokār bhī vo rakkhegā
merī ḳhushī meñ javāb ishtirāk chāhtā hai

ġham ke māroñ kī sādgī dekho
māñgte haiñ ye har ḳhushī ro ke

jo kāmyābī hai us kī ḳhushī to puurī hai
magar ye yaad bhī rakhnā bahut zarūrī hai

ġhalat hai jazba-e-dil par nahīñ koī ilzām
ḳhushī milī na hameñ jab to ġham kī ḳhū kar lī

dil-e-ġham-zada pe guzar gayā hai vo hādsa ki mire liye
na to ġham rahā na ḳhushī rahī na junūñ rahā na parī rahī

fazā ki phir āsmān bhar thī
ḳhushī safar kī uḌaan bhar thī

do aalam kī ḳhushī se kuchh nahīñ kaam
faqat ik ġham tirā hai aur maiñ huuñ