Tags-Khushi

zindagī hai ik kirā.e kī ḳhushī
sūkhte tālāb kā paanī huuñ maiñ

thī qahqahoñ kī tamannā to aa ga.e aañsū
ḳhushī kī aarzū ġham kī asaas lagtī hai

jo chāho kah lo yahī ḳhushī hai to ham bhī phir kyuuñ gilā kareñge
jo kuchh sunā.egī apnī qismat tumhāre muñh se sunā kareñge

paiġhām-e-zindagī hai ḳhushī kī naved hai
mere liye to aap kā dīdār iid hai

ab ye kise batā.eñ hameñ kyā ḳhushī milī
jis din zarā sā bojh kisī kā uThā liyā

tujhe pā sakeñ ki na pā sakeñ koī zindagī kī lagan to hai
ki ḳhushī se kaise ujaaḌ deñ tirī aarzū kā dayār ham

ḳhayālistān-e-hastī meñ agar ġham hai ḳhushī bhī hai
kabhī āñkhoñ meñ aañsū haiñ kabhī lab par hañsī bhī hai

inhī ġham kī ghaTāoñ se ḳhushī kā chāñd niklegā
añdherī raat ke parde meñ din kī raushnī bhī hai

shikva karte ho ḳhushī tum se manā.ī na ga.ī
ham se ġham bhī to manāyā na gayā ġham kī tarah

ḳhushī to ġharq-e-ġham-e-rozgār hai merī
lab-e-hayāt pe mātam hai tum na saath chalo

phir jo huuñ us ke dar pe nāsiya sā
maiñ ne ai dil tirī ḳhushī kī hai

ġham meñ ik mauj sarḳhushī kī hai
ibtidā sī ḳhud āgahī kī hai

mere āñgan meñ kyā ḳhushī aa.e
sāmne ġham kā jaal rakkhā hai

kuchh is adā se mohabbat-shanās honā hai
ḳhushī ke baab meñ mujh ko udaas honā hai

ek sā mausam lagtā hai
ḳhushī ho yā be-zārī ho

dam-bhar kī ḳhushī bā.is-e-āzār bhī hogī
is raah meñ saaya hai to dīvār bhī hogī

udaas ghaḌiyo zarā ye pata to de jaao
kahāñ gayā vo ḳhushī kā jo ek lamha thā

ḳhushī chhūtī nahīñ
dukh bastā hai

ḳhushī kyā ho jo merī baat vo but maan jaatā hai
mazā to behad aatā hai magar īmān jaatā hai

ḳhushī kā ek nayā zāviya ubhartā hai
ham apne bachchoñ se jis vaqt haar jaate haiñ