Tags-Khushi

tire vajūd ko chhū le to phir mukammal ho
bhaTak rahī hai ḳhushī kab se dar-ba-dar mujh meñ

vo jo ġham se chuur thā kaun thā
jo ḳhushī ḳhushī hai ye kaun hai

is inqilāb pe kis kī nazar ga.ī hogī
ġhamoñ kī dhuup khilī hai ḳhushī ke chehre par

kyūñki badal deñ ne.amat-e-ġham ko ḳhushī se ham
kis tarah maañg laa.eñ tabassum kisī se ham

dam bhar kī hañsī dam bhar kī ḳhushī ye bhī to dil-e-nākām nahīñ
is chaltī-phirtī duniyā meñ sab kuchh hai magar ārām nahīñ

dil-o-dimāġh pe haavī rahā ġham-e-daurāñ
ḳhushī ke saath bhī rah kar mujhe ḳhushī na milī

ḳhushī se dostī merī bhī thī magar ik din
ḳhafā huī vo kuchh aisī ki phir kabhī na milī

milā hai dard-e-mohabbat bhī ik zamāne ke ba.ad
mujhe ḳhushī ye manānī bhī hai alag sab se

dasht-e-jāñ meñ ek ḳhushī kī lahr kahāñ tak dauḌegī
vasl ke ik ik lamhe ko ham kyuuñ kar maah o saal kareñ

kahāniyāñ ḳhamosh haiñ paheliyāñ udaas haiñ
hañsī-ḳhushī ke din ga.e haveliyāñ udaas haiñ

hamārā dil to ġham meñ bhī ḳhushī mahsūs kartā hai
vahī mushkil meñ rahte haiñ jo ġham ko ġham samajhte haiñ

tarīq-e-ishq meñ hai rañj pahle aur ḳhushī pīchhe
madār-e-sub.h roz-e-vasl hai ik shām-e-hijrāñ par

naujavānī meñ ajab dil kī lagī hotī hai
ġham ke sahne meñ bhī insāñ ko ḳhushī hotī hai

so.e kabhī na saath hamāre ḳhushī se tum
jāveñge gor meñ yahī ham aarzū liye

judā kiyā to bahut hī hañsī-ḳhushī us ne
badal diyā hai ab andāz-e-be-ruḳhī us ne

hai kaun shai jis kī zid nahīñ hai jahāñ ḳhushī hai malāl bhī hai
ġham-e-judā.ī na khā tū ai dil firāq hai to visāl bhī hai

bahut ziyāda ḳhushī se vafāt pā gayā ho
to aise dil ko dukhā kar jilānā paḌtā hai

ḳhushī kī aarzū kyā dil meñ Thahre
tire ġham ne biThā rakkhe haiñ pahre

niim ke pattoñ sī kaḌvī har ḳhushī
dekhiye mujh ko ye nazrāna milā

āḳhirash ārā.ishoñ kī zindagī chubhne lagī
uub sī hone lagī mujh ko ḳhushī chubhne lagī