Tags-Khushi

apnī ḳhushī vajūd-e-gulistāñ pe ai 'nasīm'
maanā ki vo sukūn-e-nasheman yahāñ kahāñ

ye kis ḳhushī kī ret par ġhamoñ ko niiñd aa ga.ī
vo lahr kis taraf ga.ī ye maiñ kahāñ samā gayā

jaan detā huuñ kis ḳhushī se maiñ
aaj to aap marhabā kahiye

bazm-e-tarab meñ baat ḳhushī kī
ban kar ġham kā samāñ yaad aa.ī

hai sar ḳhushī meñ tujhe pās-e-ġham-kashāñ 'mānī'
ajiib riñd-e-ḳhudā-tars-o-pāk-bāz hai tū

abhī ik āḳhirī sach bolnā hai
ḳhushī se phir supurd-dār karnā

barham hai jahāñ ajab talātum hai aaj
sab rote haiñ duniyā meñ ḳhushī gum hai aaj

miltī hai ḳhushī sab ko jaise hī kahīñ se bhī
bhūlī hui bachpan kī tasvīr nikaltī hai

kyā Thikāna ġham-o-ḳhushī kā ho
dil ilāqa hai lā-makānī kā

maiñ ab marūñ ki jiyūñ mujh ko ye ḳhushī hai bahut
use sukūñ to milā mujh ko bad-duā de kar

aap ke zulm bhī ḳhushī se sahe
'shād' kis roz shādmāñ na rahā

ġham ham ne ḳhushī se mol liyā us par bhī huī ye nādānī
jab dil kī umīdeñ TuuT ga.iiñ qismat se shikāyat kar baiThe

ġhamoñ ke saath to jiinā hai umr bhar ke liye
ḳhushī ke saath to un ko shumār mat karnā

ḳhushī kā ġham jinheñ hotā hai samjho ġham-nasīb un ko
jinheñ ġham kī ḳhushī hotī hai un ko ġham nahīñ hotā

yahāñ-vahāñ ke fareboñ se Tokarī bhar lī
idhar udhar se ḳhushī kā jugāḌ karte hue

ye nizām-e-bazm-e-sāqī kahīñ rah sakegā baaqī
ki ḳhushī to chand lamhe ġham o dard jāvedānī

us se na rābta rahe us kī ḳhushī isī meñ thī
us kī ḳhushī ke vāste ḳhud ko halāk kar liyā

umr bhar kā ġham banī hai 'nūr' vo pal kī ḳhushī
hosh ke aalam meñ bhī chhāne lagīñ be-hoshiyāñ

bahār-e-gulistāñ kī hai aamad aamad
ḳhushī phirte haiñ bāġhbāñ kaise kaise

mai-e-gulfām meñ kuchh durd-e-tah-e-jām sahī
vo ḳhushī kaisī ḳhushī jis meñ kamī hai ai dost