Tags-Khushi

gulchīñ ke chehre kī rañgat roz badaltī rahtī thī
rañj-o-ḳhushī ke har mausam meñ phuul kā ek libās rahā

har aan ḳhushī se aapas meñ sab hañs hañs rañg chhiḌakte haiñ
ruḳhsār gulāloñ se gul-gūñ, kapḌoñ se rañg Tapakte haiñ

aa dhamke aish o tarab kyā kyā jab husn dikhāyā holī ne
har aan ḳhushī kī dhuum huī yuuñ lutf jatāyā holī ne

aag barsā.e ḳhushī se koī sūraj se kaho
maiñ koī mom nahīñ huuñ ki pighal jā.ūñgā

ik ajab sī kaifiyat hai in dinoñ
na ḳhushī hai aur na koī malāl

ḳhushī hai sab ko roz-e-īd kī yaañ
hue haiñ mil ke bāham āshnā ḳhush

ḳhushī terī hī hai manzūr ham ko
balā se gar koī nā-ḳhush ho yā ḳhush

vahī maiñ huuñ aur vahī zindagī vahī sub.h o shaam kī sar ḳhushī
vahī merā husn-e-ḳhayāl hai vahī un kī shān-e-jamāl hai

zindagānī is qadar be-kaif hai kuchh in dinoñ
un ke aa jaane se bhī ab to ḳhushī hotī nahīñ

jis ko tere alam se nisbat hai
ham usī ko ḳhushī samajhte haiñ

ġharq-e-ġham huuñ tirī ḳhushī ke liye
yahī sajda hai bandagī ke liye

biite hue ḳhushī ke din bhūlī huī kahāniyāñ
aap ko yaad hoñ to hoñ ham ko to yaad bhī nahīñ

kyā kahūñ kyā hai mere dil kī ḳhushī
tum chale jāoge ḳhafā ho kar

phailī hai fazāoñ meñ ḳhushī merī nazar kī
hañstī nazar aatī haiñ fazā.eñ mire ghar kī

na ho dil to kyā lutf-e-āzār-o-rāhat
barābar ḳhushī nā-ḳhushī jānte haiñ

ġham bhī ḳhushī meñ shāmil
fatah-o-shikast huuñ maiñ

mizha se qatra ḳhushī meñ chhalak rahā thā magar
sukūt-e-lab se tire mauj-e-iztirāb banā

haram-o-dair ke logoñ kī ḳhushī kyā kahnā
banda-e-ḳhāliq-o-dil-dāda-e-rām aayā hai

koh-e-alam uThā hī liyā rāh-e-ishq meñ
apnī ḳhushī ko chhoḌ ke terī ḳhushī se ham

ḳhushī milī bhī to ham ko kabhī na raas i
udāsiyoñ ke sabab is ḳhushī meñ lauT aa.e