Tags-Khushi

naved-e-sar-ḳhushī jab aa.egī us vaqt tak shāyad
hameñ zahr-e-ġham-e-hastī gavārā ho chukā hogā

nigāhoñ meñ chamak dil meñ ḳhushī mahsūs kartā huuñ
ki tere bas meñ apnī zindagī mahsūs kartā huuñ

agar ham se ḳhushī ke din bhī vo ghabrā.e jaate haiñ
to kyā ab eid milne ko farishte aa.e jaate haiñ

nāche mor ḳhushī se man meñ gaay papīhā pī pī
aao mil kar aaj bajā.eñ āzādī kī bansī

nahīñ ki dil meñ hamesha ḳhushī bahut aa.ī
kabhī taraste rahe aur kabhī bahut aa.ī

ḳhushī bāñTne ke nahīñ aap qaa.il
to ġham hī mujhe kuchh sivā dījiyegā

ye hālat huī hai junūñ meñ hamārī
ḳhushī dekhte haiñ na ġham dekhte haiñ

tū sharīk-e-zindagī hai maiñ huuñ ġham-gusār terā
terā ġham rahā hai shāmil merī har ḳhushī se pahle

agar ġham uThānā thā qismat meñ apnī
ḳhushī kyuuñ milī ġham uThāne se pahle

ayaañ ham par na hone kī ḳhushī hone lagī hai
diye meñ ik na.ī sī raushnī hone lagī hai

sunā hai aaj ke din zindagī shahīd huī
isī ḳhushī meñ har ik samt dīp-mālā hai

ḳhushī hai sab ko ki operation meñ ḳhuub nishtar ye chal rahā hai
kisī ko is kī ḳhabar nahīñ hai marīz kā dam nikal rahā hai

balā.eñ lene se mere agar ḳhushī ho tirī
balā.eñ mehr se iḳhlās se pyaar se luuñ

ye chupke chupke na thamne vaalī hañsī to dekho
vo saath hai to zarā hamārī ḳhushī to dekho

nāhaq shikāyat-e-ġham-e-duniyā kare koī
ġham hai baḌī ḳhushī jo gavārā kare koī

ḳhushī se milne lage haiñ vo aaj kal ham se
ham apnī ziist ko ab ḳhush-gavār kar leñge

ham apne ġham ko ḳhushī meñ shumār kar leñge
ḳhizāñ ke daur meñ jashn-e-bahār kar leñge

ab javānī kī umañgeñ na umañgoñ kī ḳhushī
'shād' ko hai faqat ai mauj sahārā terā

ḳhushī kī bhī ḳhabar se ab to dilchaspī nahīñ mujh ko
ki ab ai zindagī tujh se vafā achchhī nahīñ lagtī

mez par nanhā sā ik kāġhaz kā TukḌā chhoḌ kar
zindagī kī har ḳhushī vo nā-gahānī le gayā