Tags-Khushi

haath se mere vo piitā nahīñ muddat se sharāb
yaaro kyā apnī ḳhushī maiñ ne pilānā chhoḌā

laboñ par yūñhī sī hañsī bhej de
mujhe merī pahlī ḳhushī bhej de

ham de ke dil haiñ rañj-kash vo le ke dil hai jī meñ ḳhush
be-tābī-e-jāñ is taraf rāhat ḳhushī kal us taraf

jaane is meñ ġham yā ḳhushī hai pahlī baar mohabbat kī hai
apne liye to baat na.ī hai pahlī baar mohabbat kī hai

vo zindagī jo mash.al-e-vafā kī ham-rikāb thī
guzar ga.ī hañsī-ḳhushī charāġh ke baġhair bhī

ḳhushbū kī aur ḳhushī kī ummīd kyā kareñ ab
jab āñdhiyoñ kī zad meñ dil kā nagar rahā hai

ḳhushī se guzre ye sab ke liye to achchhā hai
ye zindagī hai ise bhī vabāl mat karnā

jaise us kā kabhī ye ghar hī na thā
dil meñ barsoñ ḳhushī nahīñ aatī

kyā ġham jo kū-e-yār meñ hotā huuñ pā.emāl
fart-e-ḳhushī se ḳhaak nahīñ dil meñ jaa.e rañj

laboñ par muskurāhaT gaal giile
tirā ġham ghul gayā merī ḳhushī meñ

na rah sakā kisī aalam meñ bhī tirā 'muztar'
ki ġham huā na gavārā ḳhushī na raas aa.ī

ġham saheñ yā ḳhushī ko pyaar kareñ
kaun sī chiiz iḳhtiyār kareñ

ġham hī le de ke mirī daulat-e-bedār nahīñ
ye ḳhushī bhī hai mayassar koī ġham-ḳhvār nahīñ

pyaar kā ik pal sukūn-e-zindagī de jā.egā
ḳhatm jo hone na paa.e vo ḳhushī de jā.egā

mire dukh kā tū andāza lagā de
ḳhushī ko apnī ḳhud hī tū miTā de

sab dukh tumhāre sah liye 'kāshif' ḳhushī ḳhushī
sahne kī aur mujh meñ to tāqat nahīñ rahī

jhūTā va.ada bhī agar kartī hai malne kā ḳhushī
vaqt se pahle bahut tayyār ho jaate haiñ ham

ye zindagī bhī ajab kārobār hai ki mujhe
ḳhushī hai paane kī koī na rañj khone kā

jahāñ jahāñ ḳhushī taraqqī-o-nashāt
miyāñ vahāñ vahāñ dhuāñ dhuāñ dhuāñ

maah o anjum kī raushnī gum hai
kyā har ik bazm se ḳhushī gum hai