Tags-Khushi

tum apnā chāñd ḳhushī se tamām shab dekho
hamārā kaam sitāre shumār karnā hai

ḳhushī kahāñ ki ḳhushī kā nahīñ maqām abhī
na merī sub.h abhī hai na merī shaam abhī

ajab vo shahr-e-sitamgar thā chhoḌ kar jis ko
bahut ḳhushī huī aur phir bahut malāl huā

tum jo do phuul chaḌhāo to ḳhushī ke maare
qabr khul jaa.e ye phūle tan-e-lāġhar apnā

aur kyā chiiz hai ḳhushī 'momin'
ḳhush hai mujh se ḳhudā ki ḳhush huuñ maiñ

har ḳhushī tabdīl ġham meñ ho ga.ī tere baġhair
sub.h mujh tak aa.ī bhī to shaam ho kar rah ga.ī

ik sarḳhushī muhīt hai chāroñ taraf magar
bastī meñ koī shaḳhs koī ghar bhī ḳhush nahīñ

vo ḳhushī nahīñ hai vo dil nahīñ magar un kā saaya sā ham-nashīñ
faqat ek ġham-zada yaad hai faqat ik fasurda ḳhayāl hai

razā-e-dost par qurbān jis kī har ḳhushī hotī
haqīqat meñ usī kī ġham se ḳhālī zindagī hotī

ḳhushī kā kyā ḳhushī meñ chāhe kuchh taḳhfīf kar do
matā-e-ġham ziyāda se ziyāda chāhtā huuñ

ehsās-e-ḳhushī miT jaatā hai afsurda tabī.at hotī hai
dil par vo ghaḌī bhī aatī hai jab ġham kī zarūrat hotī hai

kaho ġhamoñ se ki be-fikr ab diloñ meñ raheñ
ḳhushī kā aaj kī duniyā meñ ehtimāl nahīñ

ab ham haiñ aur haqīqat-e-ālām hai 'shakīl'
lamhe ḳhushī ke ḳhvāb-e-girāñ ban ke rah ga.e

ġhamoñ ne pyaar se jis vaqt haath phailā.e
to sab ko chhoḌ ke ham kis ḳhushī ke saath chale

aao ġham kā tavāf karte haiñ
ham faqat ik ḳhushī ke mujrim haiñ

ġham ho ki ḳhushī donoñ yaksāñ haiñ mohabbat meñ
kuchh ashk o tabassum par ham ġhaur nahīñ karte

ḳhushī se uḌte uḌte aa ga.e is shāḳh par bhañvre
jahāñ kāñToñ ne us kī maut kā sāmāñ sajāyā thā

kaun mirī ḳhushī kā dushman hai
mujh se tum us kā haal mat pūchho

tere aane kī ḳhushī bhī nahīñ hotī 'partav'
tū chalā jā.egā dhaḌkā sā lagā rahtā hai

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo