Tags-Khushi

shauq se rāh-e-mohabbat kī musībat jhel le
ik ḳhushī kā raaz pinhāñ jāda-e-manzil meñ hai

vo shaḳhs jis kī ḳhushī kā baa.is thiiñ merī bāteñ
use ab un par malāl karne bhī aa ga.e haiñ

ḳhushī ke laakh vasā.el ḳharīd lo 'ālam'
dil-e-shikasta magar pur-malāl rahtā hai

zarā Thahro mujhe kahne bhī do rūdād-e-ġham apnī
ajab-ḳhoshī tumhārī nukta-chīñ ma.alūm hotī hai

kuchh aa.ine bhī tirī anjuman meñ TuuTe haiñ
tire laboñ ke tabassum tirī ḳhushī ke liye

chāhā thā ek phuul ne taḌpeñ usī ke paas
ham ne ḳhushī se peḌoñ meñ kāñTe bichhā liye

sab se kahnā ḳhushī ke aañsū haiñ
ye bharam āstāñ se sīkhā hai

har ḳhushī se nazar churā lenā
ik ajab mehrbāñ se sīkhā hai

ḳhushī meñ ḳhush huuñ to ġham meñ bhī muskurātā huuñ
ki mujh ko zarf-e-pazīrā.ī-e-alam to milā

ḳhushī milī na agar mujh ko zauq-e-ġham to milā
milī na daulat-e-duniyā mujhe qalam to milā

jab bhī hujūm-e-ġham meñ ḳhushī kī jhalak milī
jugnū kī raushnī meñ añdhere nahā.e haiñ

manziloñ ke ba.ad dil us raaz kā mahram huā
dar-haqīqat vo ḳhushī thī naam jis kā ġham huā

zar-e-sarishk fazā meñ uchhāltā huā maiñ
bikhar chalā huuñ ḳhushī ko sambhāltā huā maiñ

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

agar ham us kī ḳhushī meñ ḳhush haiñ to dostoñ ne
javāz-e-hizn-o-malāl pūchhā to kyā kaheñge

tum aa.e bhī to ġham ko saath laa.e
mire aañsū nikal aa.e ḳhushī se

ajab ye sāneha guzrā hai ham par
tire ġham kī ḳhushī sī rah ga.ī hai

paiġhām-e-masarrat pe ḳhushī ḳhuub hai lekin
sunte haiñ ki ham-sā.e ko taklīf huī hai

na pūchh us kī dil-afsurdagī kī kaifiyyat
jo ġham-nasīb ḳhushī meñ bhī muskurā na sakā

nazik meñ un ke jaane ko ḳhushī suuñ shaad huuñ dil meñ
vale logoñ meñ dikhlāne kuuñ ho bezār baiThūñgī