Tags-Khushi

kaif-o-mastī surūr kyā ma.anī
zindagī meñ bhī ab ḳhushī kam hai

lipaT ga.e haiñ paañv se lahū meñ jazb ho ga.e
maiñ naqsh-pā-e-umr huuñ fareb-ḳhurda-e-ḳhushī

rābta rakh tīrgī se raushnī ko chhoḌ de
jo aziyyat-nāk ho aisī ḳhushī ko chhoḌ de

ḳhushī se kaaT le qātil mirā sar
huā hai ab to mujh ko be alif re

zindagī hai ik kirā.e kī ḳhushī
sūkhte tālāb kā paanī huuñ maiñ

ek jaise haiñ ḳhushī ke lamhe
dukh barābar nahīñ hote jānāñ

ḳhushī se phūleñ na ahl-e-sahrā abhī kahāñ se bahār aa.ī
abhī to pahuñchā hai ābloñ tak mirā mazāq-e-barhana-pā.ī

dard-o-ġham hī sahī ḳhushī na sahī
mujh ko jo kuchh diyā diyā tū ne

nahīñ guloñ kī jo kāñToñ kī ab ḳhushī hai mujhe
ki rāste meñ ye daulat paḌī milī hai mujhe

kise ḳhabar hai ki har ġham meñ hai ḳhushī pinhāñ
ġham-e-habīb salāmat ye jaañ rahe na rahe

terā milnā ḳhushī kī baat sahī
tujh se mil kar udaas rahtā huuñ

har masarrat alam kā hai partav
jo ḳhushī hai amānat-e-ġham hai

rañj se vāqif ḳhushī se āshnā hone na de
zindagī ko apne maqsad se judā hone na de

vo hayāt kyā ki jis meñ na ḳhushī ke saath ġham ho
vo sahar bhī kyā sahar hai ki jo shaam tak na pahuñche

jashn-e-jamhūriyat ab manā.eñ
diip yuuñ ham ḳhushī ke jalā.eñ

rāh-e-hayāt meñ na milī ek pal ḳhushī
ġham kā ye bojh dosh pe sāmān sā rahā

terī kamī satā.e har ġham meñ har ḳhushī meñ
rahtā hai aaj bhī tū is aañkh kī namī meñ

tum se milne kī ḳhushī hai na bichhaḌne kā malāl
ḳhud-farebī ke ab is moḌ pe aa pahuñchā huuñ

agar har dil meñ chāhat ho sharāfat ho sadāqat ho
mohabbat kā chaman hogā ḳhushī kī kyāriyāñ hoñgī

kyā karūñgā maiñ ab ḳhushī le kar
ġham se sairāb ho gayā huuñ maiñ