Tags-Khushi

ashk aaheñ ḳhushī Thahāke saath
zindagī vo kitāb hai pyāre

merī iizā meñ ḳhushī jab aap kī paate haiñ log
to mujhe kis kis tarah se aa ke dhamkāte haiñ log

āñkheñ to lagī rahtī haiñ darvāze kī jānib
miltī hai ḳhushī apnī hī aamad se ziyāda

jis ḳhushī ko na ho qayām-o-davām
ġham se bad-tar hai vo ḳhushī hī nahīñ

mujh ko hai hijr-o-vasl ek is kī ḳhushī na us kā ġham
kaisī musībatoñ ke din bār-e-ḳhudā bharā kiyā

ġhamoñ hī se ḳhushī hotī hai paidā hai
bahāreñ bantī haiñ daur-e-ḳhizāñ se

hai kahīñ tū maskan-e-mazdūr vaqt-e-muflisī
hai kahīñ sarmāya-dāroñ ke liye jām-e-ḳhushī

ḳhushī meñ ham ne ye shoḳhī kabhī nahīñ dekhī
dam-e-itāb jo rañgat tirī nikaltī hai

siina o dil meñ ḳhushī se na jagah thī ġham kī
ai 'ta.ashshuq' ye makāñ bhī the kabhī haañ ābād

bagūle kī tarah kis kis ḳhushī se ḳhaak uḌātā huuñ
talāsh-e-ganj meñ jo sāmne vīrāna aatā hai

ḳhushī se apnī rusvā.ī gavārā ho nahīñ saktī
garebāñ phāḌtā hai tañg jab dīvāna aatā hai

ham ko ḳhushī milī bhī to bas aarzī milī
lekin jo ġham mile vo ġham-e-jāvedāñ mile

javāñ diloñ par ġhamoñ ke taale lage hue haiñ
aur ik vo būḌhā ḳhushī kī chābī banā rahā hai

jahān-e-dil kī is iztirārī se bāhar aa kar chalo chaleñ 'shād'
ḳhushī kī mahfil ko phir sajā.eñ udāsiyoñ ko harām kar ke

atā-e-ishq hai ye dard hamdam
ḳhushī ko be-Thikāna dekhte haiñ

har nafas kī āmad-o-shud par ye hotī hai ḳhushī
ek halqa aur bhī kam ho gayā zanjīr kā

tumhārī furqat meñ kyā milegā tumhāre milne se kiyā milegā
'qamar' ke hoñge hazār-hā ġham raqīb ko ik ḳhushī milegī

ḳhushī se niiñd meñ hī chal basūñgā
vo gar ḳhvāboñ meñ hī merā huā to

kis dil se ārzū-e-ḳhushī kījiye ki ab
his tak ḳhushī kī miT ga.ī ġham is qadar mile

tamām raat āñsuoñ se ġham ujāltā rahā
maiñ ġham ujaal ujaal kar ḳhushī meñ Dhāltā rahā