Tags-Khushi

bharam khul jā.egā us ke bharam kā
ḳhushī kā ek lamha māñgne do

tirī dildāriyoñ se sūrat-e-begānagī niklī
ḳhushī aisī bhī hotī hai alam aisā bhī hotā hai

bharā paḌā thā ghar is kā ḳhushī ke siile se
ye kyā huā ki vo ab rāste kā raahī hai

ḳhushī se ranj sahe 'nāz' umr bhar ham ne
ḳhudā-gavāh kabhī āsmāñ se kuchh na kahā

maiñ bolī zindagī par dukh ke saa.e haiñ
vo bolā tum 'rabāb' ab har ḳhushī merī

yahī hai gar ḳhushī to raat bhar ginte raho taare
'qamar' is chāñdnī meñ un kā ab aanā to kyā hogā

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

maiñ vo sarv-e-bāġh-e-vajūd huuñ maiñ vo gul huuñ sham-e-hayāt kā
jise fasl-e-gul kī ḳhushī nahīñ jise rañj-e-bād-e-ḳhizāñ nahīñ

umīdeñ miT ga.iiñ ab ham-nafas kyā
nasheman kī ḳhushī rañj-e-qafas kyā

ḳhudā kā shukr adā kar vo bevafā niklā
ḳhushī manā ki tirī jaan kī bahālī huī

agar haiñ ḳhār-e-alam aadmī ke dāman meñ
ḳhushī ke phuul bhī to haiñ usī ke dāman meñ

'suḳhan' hayāt meñ kuchh aise moḌ aate haiñ
har ek lamha ḳhushī kā malāl detā hai

dayār-e-ġham ko miTā kar basā jahān-e-ḳhushī
na.ī fazā na.e lail-o-nahār paidā kar

dukh nā pahuñchā kisī ko baabā tere 'ḳhālid' se
un ne to sau baar ḳhushī ko ġham ke evaz nīlām kiyā

dīvālī kī ḳhushī thī paTāḳhoñ kā shor thā
maiñ kar rahā thā us kī ḳhamoshī se guftugū

har ḳhushī mom kī guḌiyā hai muqaddas guḌiyā
taaj sho.aloñ kā zamāna jise pahnā.e hai

bām-o-dar 'farāsat' ab kyā hameñ ḳhushī deñge
zindagī basar kar dī ġham ke shāmiyāne meñ

vo ġham de rahe haiñ ḳhushī ho rahī hai
haqīqat meñ ab āshiqī ho rahī hai

ḳhushī kī bazm meñ ham-raqs haiñ sabhī lekin
karegā paar mire saath ġham kā dariyā kaun