Tags-Khushi

vo ab hamāre pahlū meñ baiThe hue haiñ 'dard'
Dar ye hai mar na jaa.eñ kahīñ is ḳhushī se ham

aap to apnī ḳhushī se haiñ ġhulām ibn-e-ġhulām
aap kī qīmtī zanjīr se andāza huā

ġham uThāte haiñ vahī aksar ḳhushī paane ke ba.ad
jo ḳhizāñ ko bhuul jaate haiñ bahār aane ke ba.ad

ik ijtihād kā pahlū zarūr hai tujh meñ
ḳhushī huī tire nā-vaqt muskurāne se

na.e dīvānoñ ko dekheñ to ḳhushī hotī hai
ham bhī aise hī the jab aa.e the vīrāne meñ

har ḳhushī kī maut haiñ
be-lagām ḳhvāhisheñ

mujhe ḳhushī hai ki aaj merā junūñ bhī yuuñ mere kaam aayā
samajh ke dīvāna-e-mohabbat tumhāre hoñToñ pe naam aayā

sahar hone ko hai bedār shabnam hotī jaatī hai
ḳhushī minjumala-o-asbāb-e-mātam hotī jaatī hai

tabī.at in dinoñ begāna-e-ġham hotī jaatī hai
mire hisse kī goyā har ḳhushī kam hotī jaatī hai

koī jahāñ meñ ḳhushī se guzārnā chāhe
to be-shumār bahāne ḳhushī ke hote haiñ

āsmāñ se kabhī dekhī na ga.ī apnī ḳhushī
ab ye hālat hai ki ham hañste hue Darte haiñ

hameñ nit asīr-e-balā chāhtā hai
hamārī ḳhushī kab ḳhudā chāhtā hai

jahāñ jahāñ bhī ga.ī ġham ke ās-pās rahī
kisī maqām pe dekhī nahīñ ḳhushī tanhā

zamāne bhar ko mubārak ḳhushī kā aalam ho
hamāre vāste ai dost tum kahāñ kam ho

hameñ duniyā meñ apne ġham se matlab
zamāne kī ḳhushī se vāstā kyā

ġham-o-ḳhushī ke agar silsile nahīñ chalte
to mere saath kabhī hausle nahīñ chalte

kaise mileñ ham tum se yaaro kaise bulā.eñ ghar apne
ġham hī ġham haiñ paas hamāre koī ḳhushī kī baat nahīñ

tere milne kī ḳhushī tere bichhaḌne kā malāl
ġhamza-e-shām-o-sahar ne hameñ jiine na diyā

mujh ġham hī de na ḳhushī sahī na karam sahī to sitam sahī
magar itnā kam bhī karam na ho ki tirā sitam bhī mazā na de

har ek ġham ko ḳhushī kī tarah baratnā hai
ye daur vo hai ki jiinā bhī ik hunar sā lage