Tags-Khushi

ḳhushī mile to tire ba.ad ḳhush nahīñ hote
ham apnī aañkh meñ har-dam malāl rakhte haiñ

ḳhushī sī miltī hai ḳhud ko aziyyateñ de kar
so jān-būjh ke dil ko niDhāl rakhte haiñ

vafūr-e-yās kar detā hai jab labrez-e-ġham dil ko
ḳhushī ban kar mire dil meñ samāne kaun aatā hai

visāl ko ham taras rahe the jo ab huā to mazā na paayā
adū ke marne kī jab ḳhushī thī ki us ko rañj-o-alam na hotā

vahāñ pe gūñjtī hogī ḳhushī kī shahnā.ī
yahāñ to mayyat-e-armān uTh rahī hogī

nārāzgī na ho to mohabbat hai be-maza
hastī ḳhushī bhī ġham bhī hai nafrat bhī pyaar bhī

be-āp ḳhushī se ek idhar kuchh khoyā huā sā ek udhar
zāhir meñ baham bātin meñ judā tum aur kahīñ ham aur kahīñ

vo ḳhushī dikhā.ī na charḳh ne ki evaz meñ jis ke na ġham diye
kabhī farsh-e-gul hai jo ek shab to mahīnoñ bistar-e-ḳhār hai

iltifāt aap kā bajā lekin
kyā ḳhushī hai ki aañkh pur-nam hai

vo dukh to ḳhushī ke baab meñ the
ye dukh jo tulū ho rahe haiñ

lashkar-e-ġham se jītne ke liye
chand-roza ḳhushī hī kaafī hai

ḳhushī kā vaqt hai aur aañkh pur-nam hotī jaatī hai
khilī hai dhuup aur bārish bhī chham-chham hotī jaatī hai

jin ke khulne se duniyā kā har gulshan ābād huā
un kaliyoñ kī ḳhushī sajā kar shahnā.ī muskātī hai

ik karb-e-nā-tamām se niklā to ro paḌā
merī ḳhushī najāt se pahle kī baat hai

zindagī ne ḳhushī ke dhoke meñ
rabt ġham se baḌhā ke dekh liyā

jis ko tere alam se nisbat hai
ham usī ko ḳhushī samajhte haiñ

behad ḳhushī hai, aur hai be-intihā sukūn
ab dard hai, na ġham, na gila hai, ye ishq hai

ab vo ḳhafā hue haiñ to yuuñ bhī hai ik ḳhushī
marnā hamāre vāste mushkil nahīñ rahā

na koī apnā ġham hai aur na ab koī ḳhushī apnī
tumhīñ kah do ki ham kaise guzāreñ zindagī apnī

mujhe nahīñ hai zarā rañj tah-nashīnī kā
mujhe ḳhushī hai chalo merā bhaa.ī sat.h pe hai