Tags-Khushi

mirī ummīdoñ ko rauñd kar ab mirī ḳhushī kī hai tum ko parvā
ye kyā nayā ruup tum ne dhārā ye kyā koī nit-nayā bharam hai

ḳhushī ke vāste kab koī din muqarrar thā
magar ye dil meñ rukī hai tire ḳhirām ke saath

anjām-e-bahār sūjhtā kyā
āġhāz-e-bahār kī ḳhushī meñ

man kī ḳhushī milegī tū ye nek kaam kar
TuuTe hue diloñ ko kisī tarah jaḌe tū

merī chaukhaT pe ġham chalā aayā
sauñp dī us ko har ḳhushī maiñ ne

har ḳhushī tere naam kī maiñ ne
vaar dī tujh pe zindagī maiñ ne

baḌhā dil is qadar fart-e-ḳhushī se vasl kī shab ko
mujhe ye vahm thā pahlū meñ ye takiya hai yā dil hai

ai falak jis jis tarah kā ġham tū chāhe mujh ko de
maiñ kabhī nālāñ na huuñ hargiz rahūñ har dam ḳhushī

ai azīzo is ḳhushī ko kui ḳhushī nahīñ pahuñchtī
āshiq aur ma.ashūq jab hote haiñ mil bāham ḳhushī

ham to apne dard aur ġham meñ nipaT mahzūz haiñ
ham ko kyā is baat se rahtā hai gar aalam ḳhushī

kyā kareñ kyūñ-kar raheñ duniyā meñ yaaro ham ḳhushī
ham ko rahne hī nahīñ detā hai hargiz ġham ḳhushī

yaar hai mai hai chaman hai kyuuñ na ham ḳhush-vaqt hoñ
is tarah kī hogī ai 'tābāñ' kisī ko kam ḳhushī

āshiq ḳhushī se mar na kahīñ jaa.e sunte hī
tasvīr-e-dil hai aa.ī udhar se javāb meñ

har ghar meñ bachche dhuum kareñ
tasvīr-e-ḳhushī meñ rañg bhareñ

jo tire pahlū meñ guzrī zindagī achchhī lagī
ġham tirā achchhā lagā terī ḳhushī achchhī lagī

ye is takalluf-e-bejā kī kyā zarūrat hai
ki ek mish.al-e-jāñ thā ḳhushī se jaltā maiñ

rañj koī shai na koī shai ḳhushī
muḳhtalif ehsās kā ik naam hai

āñgan se hī ḳhushī ke vo lamhe palaT ga.e
sahrā-e-dil se barse baġhair abr chhaT ga.e

vo ek karb-e-musalsal jo dil jalātā thā
tum aa ke paas jo baiThe to sarḳhushī sā lagā

ḳhushī zarūr thī 'taimūr' din nikalne kī
magar ye ġham bhī sivā thā ki raat biit ga.ī